L comité referendar da souramont desconsieia dassen a la jent ladina da souramont (Anpezo, Fodom y Col) de tò pert a la iniziativa „Belluno Autonoma Dolomiti Regione“.
I promotours é tl laour de cueie adum firmes te duta la provinzia de Belun per arjonje n referendum aladò dl art. 132 dla costituzion taliana per n destach da la region Venet y la inclujion dla provinzia de Belun desche terza provinzia autonoma tla Region Trentin-Sudtirol.
L comité dij: „Nos on bele fat n referendum y nostes motivazions é d’autres“. Chesta la posizion dl comité referendar con a cef Siro Bigontina (foto en gaujion dla festa do l referendum a Cortina): „Les popolazions di trei comuns de Anpezo, Fodom y Col Santa Lùzia, storicamenter liedes da trueps secui al vedl Tirol y a la diozeja de Persenon, ne à mai azeté la despartizion dl popul ladin do la pruma Gran Vera. I trueps tentatifs fac tresfora dal 1919 inant é dagnora vegnus ostacolés per rejons politiches.
L ann 2007 ti à les unions ladines de Anpezo, Fodom y Col damané a les respetives aministrazions comunales de endì n referendum popolar per la reunificazion di ladins dl Sela tla region Trentin-Sudtirol. I dis 28-29 de otober 2007 él vegnù tegnù l referendum che à dé chisc resultac: 78,86% di litadours à dit scì y 20,28% contrars.
Vedù che l comité „Belluno Autonoma Dolomiti Regione“ é tl laour de cueie adum firmes sun dut l teritore provinzial y do avei liet sies motivazions tl manifest dl comité, tl plen respet de chesta iniziativa, strument de democrazia per dé adentene la volonté popolara, ratonse dret informé y aconsié i sentadins di trei comuns de Anpezo, Fodom y Col de ne tò nia pert a la recoiuda de firmes che vegn ence fata te nosc comuns. Nosta popolazion à bele dé adentene clermenter sia volonté tres l referendum dl 2007.“
(0)Al ne me plej nia
(1)937 iadesc liet
Scrive n comentar a revert de "No a „Belluno Autonoma Dolomiti Regione“"