La sconanza dles mendranzes à arjont ti ultims dejenés n cert degré standard sot a chel che an ne pò nia jì, sce an ne vuel nia se mete (sciche stat, corporazion locala, sciche partì o grup de enteres) aldefora dla sciala de valours europeics. Pro chestes discriminazions auda p.ej. che mendranzes ne dess nia vegnì spidicedes tres confins o despartizions te certli litai a na moda da ne les dejavantajé nia te sia raprejentanza politica.
Foto: l SVP-Ortssauschuss St. Ulrich adora samben demé l lingaz todesch.
Laprò auda tamben l ensegnament de sie lingaz te scola y la doura de sie lingaz tla aministrazion y te gliejia. Chest y ciamò truep deplù à la SVP reclamé y arjont per i todesc te Sudtirol. An se fej perchel dassen demarevueia che l grup SVP de Urtijei fej depierpul tresfora audì sia oposizion che chisc derc ti vegne reconescius en pert ence ai ladins, dijan p.ej. che „tres n certl lital ladin per les lites parlamentares deventassa i ladins te Sudtirol na mendranza che ne pò nia plu dezide de sie davegnì“. Chest ne stimeneia bele numericamenter nia (di entourn a 35.000 ladins en vìvel 20.000 tla provinzia de Bulsan) y an se damana ben olà che i ladins raprejenteia atualmenter na maioranza te Sudtirol? Veir él che con chestes afermazions declareia la SVP de Urtijei che ala se sent pert dla mendranza todescia. Y enscì se splìghen ence sie spiso contra na revalutazion dl ladin tres n lingaz scrit standard. Per la SVP de Urtijei éla dret scempla: an scriv demé todesch, an vuel demé messes todesces, an met l termul sun l jouf dle Sela, y conseguentamenter ne àn nience debujegn de n lingaz scrit unifiché. Dl 1976 à la SVP de Gherdeina enfinamai pluré dant a la Court Costituzionala per podei istituì scoles todesces te Gherdeina. Sce al ne fossa tla SVP ladina nia ence valch cef plu aciomé, messéssen veramenter prié la SVP todescia de raprejenté i enteresc di ladins.
Marco Pizzinini
(0)Al ne me plej nia
(0)676 iadesc liet
Scrive n comentar a revert de "SVP de Urtijei dantcà contra rejons di ladins"