N scì cler a 2 referendums

La arjonta dl cuorum pro l referendum ai 25 de otober é bonamenter na streda dassen erta. Chisc dis comparéscel i prums placac. Al mancia endere l consens di partis. La Svp se tegn dalonc o desconsieia da la partezipazion. 3 propostes referendares vegn da la „Union für Südtirol“ con chela che nia duc partesc fins y obietifs.

Tres l referendum podéssel ence vegnì metù en pericul l ampliament dl aereoport de Bulsan. Ladins Dolomites se dij clermenter a una per na partezipazion ai referendums: „L referendum é l miour strument de partezipazion politica di zitadins“. Per cie che reverda l contegnù  di cin referendums endere é LD per n scì cler demé a 2: a chi sun l ampliament dla democrazia direta, un prejenté da la Iniziativa per deplù democrazia y l auter metù dant da la Union für Südtirol (propostes 2 y 5). Per cie che reverda l referendum sun la desvenuda dl daciasa („Ausverkauf der Heimat“) é Ladins Dolomites a una con i fins, ma vignun dess spo valuté enstes, sce la soluzion veduda dantfora dal referendum é adateda per arjonje chi fins. L medem vel per i autri doi referendums.
I dessegns de lege metus a referendum ai 25 d’otober é:
1) referendum per tré dant la jent tl post pro la conzescion de contribuc per l fabriché alesiré, sostegns finanziars per fitadins y abitazions soziales. Chest referendum vegn raté anti-sozial y en contrast con les normes europeanes.
2) ampliament dla poscibelté de referendums popolars pro de gran projec che se ghira l ejam de soportanza ambientala;
3) stop a la desvenuda dl enciasa, ti sourandan deplù podeis regolatifs ai comuns;
chestes é les trei propostes dla „Union für Südtirol“
y en plu 4) n referendum contra l ampliament dl aereoport a Bulsan, metù dant dal „Dachverband für Natur- und Umweltschutz“ y
5) l dessegn de lege general dla scomenciadiva per deplù democrazia popolara tres chel che i zitadins dess ciafé plu lerch, plu ousc y plu poscibeltés de  compartezipazion politica de coche la lege sun i referendums popolars atualmenter en doura veid dantfora.

Al me plej(0)Al ne me plej nia(0)

534 iadesc liet