La SVP ladina scriv, tres la pena de sia vize-sourastanta Paola Bioc Gasser, che al vuel ester manco burocrazia te Sudtirol. Do che la SVP à governé y crié te 60 agn enstessa n sistem plu che burocratisé, ciaradous y puech efizient, él da se damané tant de credibelté che chestes paroles à?
Chesta la critica de LADINS DOLOMITES. „La SVP ladina sà avisa cie che ne funzioneia nia te Sudtirol, ma ala savaia da scluje i uedli, penson al sistem de privilegs per si favoris (Postenschacher), metù en pé da la SVP a dann dla comunité o al sistem de assegnazion di laours publics, fajan jì cialà di cosc‘ tres variantes ad hoc che vegn spo aproedes (p.ej. l Istitut cultural ladin a San Martin o sen l implant da encendré a Bulsan)“, dij Albert Pizzinini. Ladins Dolomites se damana plu fac y no demé paroles, végnel scrit te sia comunicazion.
L parché di auti tl ospedal de Bulsan é na autra chestion trateda ultimamenter da LD che dij che al é na chestion che reverda duc i zitadins. „Emprumadedut él vegnù fat na parchera che degugn ne se ghira y che ne jiva nia assolutamenter debujegn. Sen végnela nuzeda dal govern provinzial per tré ite scioldi“, criticheia LD. „L ospedal n’é degun zenter comerzial, al é na luegia olàche l zitadin và, sce al à debujegn. L ospedal é la luegia olàche an se festidieia dla sanité, n dert che mess vegnì garantí da la aministrazion y nia n post per ti brancé te gaiofa ai zitadins. Degugn ne và tl ospedal per orela curta“. Perchel se ghira LADINS DOLOMITES (LD) n arbassament dla tarifa orara a n livel azetabel.
(0)Al ne me plej nia
(1)570 iadesc liet
Scrive n comentar a revert de "Svp: Bioc y burocrazia"