Enier, lunesc 16 de november, fòvel sun la lista dles tratandes dla jonta provinziala ence la dezijion sun n daz sun i joufs dolomitans de Frera y Sela a meteman dal isté 2010. Al parova na cossa fata fora, enfinamai unilateralmenter. Encandenò se à dut desfanté tl nia. Al ne é nia daldut cler ciunes che é stedes les rejons viadedò.
L servisc stampa dla provinzia de Bulsan ne se à nience tout la bria de dé fora na spligazion tl detai, condut che l assessour ladin, Florian Mussner (Svp), ne à sconé degunes fadies per arjonje chest daz. Ence la EURAC (Academia Europeica) ti ova dé spraiza. Ala ne ti é endere nia garateda tla jonta. Depierpul che la Generela à lascé alsavei sies poures per na scluta di joufs a daz, cie che podessa endeblì ciamò deplù i contac interladins, ne à la Lia di comuns ladins tout deguna posizion ofiziala.
Les rejons é deplù: les provinzies de Trent y de Belun ne à mané endour deguna touta de posizion sun la proposta de scluta a daz che ti é vegnuda maneda de otober, piec ciamò ales se à desmostré dassen iritedes da n tel vare unilateral. Dunrwalder à lascé alsavei che an vuel aspeté con na dezijion tl cheder dla definizion dla problematica ti grems dla fondazion UNESCO.
(0)Al ne me plej nia
(1)745 iadesc liet
Scrive n comentar a revert de "Daz sun i joufs: desfanté"