Stries y strions sun Börz

Les prumes seires metudes a jì da la lia „Cultura da Mont“ sun Börz (Antermeia) con ert, folclor y cultura, é stedes n suzes plen, enceben che pro la mostra d’ert alalergia él suzedù n fat desplajoul. Una na instalazion (metuda adum da wc’s dl duo Michael Moling y Gustav Willeit) é vegnuda desdruta y spidiceda da „anonims“ entratant la nuet dal venders a la sabeda. Al pèr che an ae bele afustié i malfatours che dess ester n clap de joegn da La Val. Chest fat ne à nia insciautrì i organisadours. Les seires jirà inant sciche programedes ence chest fin d’edema. La presidenta dl comité de organisazion Irsara Gaby con n paur da mont che se beiv n got de nida.

En venders él sté mez l paisc che à fat pera pro la desfileda di „paurs da zacan“ con guanc da enlaouta y ciaussa, ciavai y cioures. Sun l pré de Sarighela él vegnù fat deplù desmostrazions sciche an vivova y laorova zacan samont. Te ciasota, te tablé y sun i pres fòvel truep da laour. Te ciasota vegnìvel cujiné speisa scempla sun fuech davert con l fané. Da doman jiva i paurs adora, dant orì de soredl, sun pré a sié aldagns che al fova ciamò tume, les tiradums defata do a tré bagoc y tré adum l’erba y l polif te rodeles da restlé plu saurì dedò. Per n bon tai jìvel debujegn da bate la fauc endertura con mai y ancugn. Duc chisc laours é vegnus prejentés en curt. Da ciarcé él sté n scarté che fova zacan n ceif da vignidì y d’autres derzedes tipiches. Per i mutons se àn festidié per n grum de triparies. Da seira él sté esibizions dl Grup bal Popular Val Badia y dl grup cors da Munt da Rina. Plu tert da seira, al scur, él spo sté la enconteda dles „stries y di strions“ sun i pres de Sepütia al sonn dles percuscions dl grup de Max Castlunger y compagns. Bele da zacan ne fova l jì a mont nia n temp zenza plajeis y orela curta. An contova lijendes, al fova l venders da mont olàche an se abinova pro valch tablé a soné y balé y a la fin la  segra da mont.
L teater „La Strega“, toch scrit da Iaco Rigo, sot a la rejia de Simon Kostner, sarà ciamò da vedei i dis 6, 7 y 8 de aost (ciala calender de Noeles.net!). Da seira spo bal dles stries alalergia.

 

Al me plej(0)Al ne me plej nia(1)

334 iadesc liet

Ortiede inant tres

Scrive n comentar a revert de "Stries y strions sun Börz"

Scrive n comentar