N liber nuef sun la Pruma Vera

Lorenzo BaratterEn mercui, ai 9 de setember 2009, vegniràl prejenté tl museum storich dla Vera a Rorei n liber scrit da Lorenzo Baratter (diretour dl zenter de documentazion de Lusern / Dokumentationszentrum Lusern) dal titul „La Grande Guerra delle Minoranze Ladini, Mòcheni e Cimbri“. Tla pruma vera dl mond fova les valedes ladines tera de confin anter l Imper Austro-Ungarich y l Regn dla Talia che tingiova dassen de deslarié sies seides enfin al jouf dl Brenner. Les linges de vera asulciova amesafora les Dolomites.

Sibe ladins che mochens y zimbri combatova con ardiment da la pert dl Imper Asburgich y ne sentiva – a pert valch ezezion rera – net degun debujegn de vegnì delibrés dai talians dl Regn dla Talia a desvalivanza di trentins talians (iredentism). L liber contegn trueps documenc, testemonianzes y retrac che respidla les entravegnudes, dolorouses, da enlaouta. La publicazion se tol dant de sclarì, ence a la popolazion trentina, les aspirazions te chi temps dles comunités ladines, mochenes y zimbres che ne fova daldut nia les medemes di trentins talians. Les interpretazions che an ti dà é perchel samben autramenter.
La prejentazion vegn fata, ai 9 de setember 2009, da les 17.30 tl museum storich talian dla Vera a Rorei con a la pert l president dla provinzia de Trent, Lorenzo Dellai. I reladours dla seira é Camillo Zadra provedidour dl museum storich, Giuseppe Ferrandi, diretour dla fondazion dl museum storich dl Trentin y l autour Lorenzo Baratter che é autour de cotantes publicazions a tema storich dles does veres, anter l auter ence de na monografia soura l canonich sudtiroleis Michael Gamper. Sie sit personal é: http://www.lorenzobaratter.it/content-www/t_biografia/.

Cliché sun la foto per la engrandì!

 

 

 

 

 

 

 

 

 

 

Al me plej(0)Al ne me plej nia(1)

437 iadesc liet

Ortiede inant tres

Scrive n comentar a revert de "N liber nuef sun la Pruma Vera"

Scrive n comentar