Les ombries dl fascism

Tres l decret R.D. n. 93/1923 é i comuns ladins da souramont, Fodom, Col y Anpezo, gnus destachés a ries da les autorités fascistes da Südtirol.

Chest decret, contra la volonté declareda di ladins, é dutaorela en forza. Desche an à vedù ne él suzedù do l referendum, dal meis de otober 2007 inant, praticamenter nia tla chestion. Al ne se à muet nia.
Per chest motif s’à Siro Bigontina metù en contat con l on. Bressa, capogrup al Parlament dl PD,  per damané, sce al ne fossa nia sté na poscibelté da tò demez chest decret. A chesta maniera fossa l troi dla reunificazion per i trei comuns plu saurì de chel prevedù dal iter referendar.

Do che Bressa ti é ju do a la cossa él suzedù bendebot de sensazion. L minister dla Lega Nord, Calderol,i à dant da puech temp lascé abolì truepes leges fascistes, p.ej. ence chela che prevedova l’aplicazion di inoms  dles localités „iredentes“ inventés da Ettore Tolomei. La gran marevueia é steda chela che anter chestes leges abolides fòvel ence l decret R.D. n 93/1923. Chest volova praticamenter dì che i comuns fajova da l’abolizion inant endò pert de Südtirol. Na gran sperduda per trueps!

Enfin ai 16 de dezember 2010 ova l govern temp da jì contra l’abolizion con n decret scempl, dedò essa la cossa messù passé tres l Parlament talian, che essa messù definí danuef, sce i comuns ladins da souramont é pro Belun o pro Bulsan. Con l resultat positif dl referendum fossa la cossa steda clera y scempla. Ma enier à Siro Bigontina ciafé na burta novela da pert dl parlamentar Svp Karl Zeller: „Cer Siro, baudì se à l govern anadé dl „fal“ y à metù endò ite l R.D.n. 93/1923 tla lista dles normes da „salvé“ da l’abolizion.  Decuermenter, on. Karl Zeller“

Sun chesta é dutes les speranzes judes do l’ega fora. Sce l govern s’à recordé da soul o sce al é gnù daidé da valgugn che é contra la reunificazion é na ria domanda. La chestion fova demé a conescenza de puecia jent. Siro à demé rejoné con Zeller y Bressa. Bonamenter él sté valch talpina che à informé adret’ora les dretes persones. Al vegn conté che ence sun la chestion di inoms fascisc‘ inventés da Tolomei él sté persones „locales“ che à informé l govern per restrenje „l dann“. An pò dì che al é veramenter gnù perdù na ocajion d’aur.

Al me plej(0)Al ne me plej nia(1)

838 iadesc liet