Ladins de dutes les valedes pò sotescrive

N valgugn intervegnus pro l Open Space a La Ila ai 04 de merz 2016.N valgugn intervegnus pro l Open Space a La Ila ai 04 de merz 2016.

L carossel di ‘open spaces’ dla Convenzion sun l’Autonomia é ruvé ence a La Ila per tò su les idees y propostes dla jent ladina en cont dla reforma dl Statut. La Ila é steda na bona ocajon per baraté fora idees ma dantaldut per se enconté:  duc i “players” dla politica ladina – parlamentars, assessours y conseiers provinziaiy regionai, ombolc, raprejentanc dla scola y dles lies culturales, zitadins scempli – se à abiné fisicamenter tla medema cornisc, tl medem salf per rejoné di problems di ladins y de sie davegnì. Chest é n resultat positif en se enstes, dandaldut sce an conscidra che fina sen se ova chisc plu tegnì fora che colaboré al medem projet.

La Convenzion jirà inant aldò de sie program dé dant da la lege y an spera che les propostes portedes dant a La Ila vegne toutes su da la Convenzion di 33 y spo dal Consei dla Provinzia de Bulsan. Ma la discuscion jirà inant ence defora da la Convenzion. Ie enstes à fat la proposta che i “players” da la Ila se enconté defora dal cheder dla Convenzion per rejoné a fonz di valours dla mendranza ladina y de sia sconanza, dles priorités y di mesi che va debujegn per arjonje chisc traverc. I vedaron sce chest invit vegnirà tout su da la politica.

Ence la recoiuda de sotescrizions per l Memorandum jirà inant. Chilò volessi recordé che l Memorandum, ence sce al é focalisé sun les ghiranzes di ladins de Südtirol, reverda ence i ladins dles autres valedes: tl preambel végnel sotrissé che la sconanza dl lingaz y dla cultura ladina ghira na soluzion globala y panladina y che la reunificazion de Souramont con Südtirol é na ghiranza fondamentala di ladins dles Dolomites. Chesta ghiranza storica restarà al ordin dl di dla politica ladina fina canche i giataron na soluzion unitara che vae ben per duta la Ladinia.

Con la recoiuda de sotescrizions volonse ti dé plu forza a les ghiranzes dla mendranza ladina y a chi che é cherdés a les fé valei, daite y defora da la Ladinia. Perchel volessi ciamò n iade envié i ladins de dutes les valedes a sotescrive l Memordum sun l sit www.noeles.info.

Erwin Valentini

Al me plej(2)Al ne me plej nia(0)

745 iadesc liet

Ortiede inant tres

1 n comentar a revert de "Ladins de dutes les valedes pò sotescrive"

  1. Na enconteda de raprejentanc istituzionai che messa ester. Jent ben puecia! Sciode

    Al me plej(0)Al ne me plej nia(0)

Scrive n comentar

La miscion e-mail ne gnirà nia publicheda.


*