Generela y Lia à enconté Platter

Ai 18 de jené ti à na delegazion ladina fat na vijita al Sourastant dl Tirol Günter Platter. An à tout la ocajion de tó endò su i contac storics anter la Ladinia y Desproch.

Y an à porté dant n valgunes ghiranzes, che sarà tl davegnì de importanza fondamentala per i Ladins. La delegazion ladina fova metuda adum da na raprejentanza dla Union Generela (con a cef la presidenta Elsa Zardini) y da na raprejentanza dla Lia di Comuns Ladins (l’ombolt da La val, Dr. Franz Complojer) y é vegnuda touta su tl palaz provinzial dal Sourastant Platter y da la assessoura a la cultura Beate Palfrader (con parentela tla Ladinia, plu avisa a la Pli de Mareo).
{xtypo_quote_right}Dret emportanta é la partezipazion de duc i Ladins – ence de chi de Souramont – a la Euregio Tirol.{/xtypo_quote_right}Pian via dal gran resson che la partezipazion di Ladins a la gran desfileda storica dl 20 de setember 2009 à abù, ti él vegnù prejenté n curt al sourastant Platter y a la assessoura Palfrader la situazion atuala di Ladins dles Dolomites, dantaldut sia tripartizion y i problems che nasc da chesta situazion, souraldut la puecia y deguna sconanza che i Ladins à te Souramont. An à spo rejoné dl referendum di trei comuns de Fodom, Col y Anpezo y de sia volenté de ruvé endò pro l Südtirol, che mess tres ciamò vegnì traté tl parlament talian, sceben che entratant él passé passa doi agn.
Dret emportanta é la partezipazion de duc i Ladins – ence de chi de Souramont – a la Euregio Tirol. Zenza ruvará Souramont pro la Euregio “Alpen-Adria”, adum con l Venet, l Friul , la Slovenia y pertes dla Croazia. Te na tel Euregio jissa les carateristiches ladines-tiroleises di trei comuns endò sot.
A la fin ti él vegnù porté dant al sourastant Platter la proposta de deslarié i derc di Ladins dl Südtirol tl’Austria (azes a les universités, ai studentac, a scomenciadives de cultura y de formazion) ence ai ladins fora dl Südtirol.
Sibe l sourastant Platter che la assessoura Palfrader à empermetù de sostegnì les ghiranzes di Ladins y de se dé da fé per sia atuazion.

Al me plej(0)Al ne me plej nia(1)

681 iadesc liet