Dolomites: senta a niza

Giorgio Napolitano - president dla republicaEncuei se àl abiné a Auronzo, tla localité ciadorina viadò l jouf de Trei Croujes o les Trei Pizes de Lavarei, truepa prominenza politica locala y nazionala per festejé la inclujion dles Dolomites tl register UNESCO dles arpejons naturales dla umanité, anter chisc dantfora l president dla republica Giorgio Napolitano en persona, l minister Giulio Tremonti, la ministra al ambient Stefania Prestigiacomo, l president dla region Trentin-Sudtirol Durnwalder y l president dla region Venet Galan. L president Napolitano à recordé che per arjonje chest reconesciment da pert dla UNESCO àl volù ester agn de laour da pert dles istituzions a livel local y nazional. Sen che an é ruvés a chest travert, vàl debujegn de sconé y de valorisé al miec chest patrimone.

La ministra al Ambient, Stefania Prestigiacomo, à dé da entene a Auronzo ciuna che podessa ester la senta dla fondazion Dolomites UNESCO: per ela déssela baraté ju vigni 2 agn, tiran a la niza, sun la basa de na lista de localités. L davegnì dles Dolomites àla dit, é encorajé n „turism monejel“ y sen déssen mete man atira de controlé deplù la cualité dl’aria, dles eghes, i glaciers, les veines d’ega, i salverjins y la funzionalité dles semenes da mont. Les Dolomites y sie reconesciment da pert dla UNESCO, à dit la minsitra, raprejenteia, na bona ocajion per mete tla pratica na maiour sconanza con vantajes per duc.
Ence l president dla provinzia autonoma de Bulsan y president en ciaria dla region Trentin-Sudtirol, Luis Durnwalder, à tout la parola saludan con gran marevueia de duc sibe per todesch che per ladin i antervegnus. Canche al à rejoné todesch él sté n valgunes persones anterite che à sciblé per „protesta“. Durnwalder à recordé en curt i fac de vera amesa chisc teritores, encuei deventés simbol de pesc, y l laour dla jent te chesta contreda. „Al é dret festejé“, àl dit, „ma i messon tamben laoré dassen per mantegnì chest teritore san enton“. Bele i dis dantfora ova Durnwalder ghiré che la senta dla fondazion UNESCO sie logheda tla provinzia de Bulsan. Deguna dles 5 provinzies a la pert ne pò se empermete de se lascé sciampé la/na senta. Al plu tert dl 2011 tomaràl n dezijion.

Cialedi ai filmins youtube clupés adum da Noeles.info sun youtube sun l argoment Dolomites UNESCO.

{youtube}AC986D5797E0426A{/youtube}

{2jtabs_plugin 2}

 

Al me plej(0)Al ne me plej nia(1)

657 iadesc liet

Ortiede inant tres

Scrive n comentar a revert de "Dolomites: senta a niza"

Scrive n comentar