Scolina: degun contat

Marco PizzininiTe na intervista respon la diretoura nueva, enciarieda dles scolines ladines, a la domanda, sce ala à raporc ence con les scolines da souramont, che al ne é degun contat, ciodì che danlò ne él degun ladin y al é demé dut per talian! Na tel declarazion, fata da na diretoura de na istituzion de scola y de cultura tant emportanta desche la scolina, fej n pue pensé do y é ence te sie contegnù faleda, ciodì che sie te Fascia che te Fodom végnel proé tant inant che al é poscibel, da adoré l ladin tles scolines, ence sce la situazion legislativa é, desche an sà, cotant plu ria che te Südtirol.

Via en Ampez él la jent che volessa che al vegnissa adoré l ladin bele te scolina, ma chilò él la istituzion che manejeia les scolines, la gliejia locala, che é decontra (les scolines via en Ampez é privates).
L nia podei adoré l ladin tles scolines y tles scoles é pu sté una dles motivazions che à porté Ampezans y Fodoms a fé l referendum dl 2007 per passé a la Provinzia de Bulsan.
Al é da se fé demarevueia che al ti vegn trat dant a chi da Souramont che ei à demé talian te scolina, sceben che ei à bele plu gonot proé da mudé chesta situazion, ma desche dagnora ne é sia ghiranza nia vegnuda touta su y degugn ne i à daidé sceriamenter.
Sce n gran travert dla diretoura nueva é chel da curé l contat con les scolines todesces y talianes de Südtirol, spo rati che al fossa ence dret da colaboré con cheles da Souramont che à atualmenter de gran dificoltés da fé respeté n dert fondamental desche chel da podei rejoné l lignaz dla oma te scolina y te scola. Chisc problems pèrel che demé l ladin ae, sce an veid tant truep che al vegn fat per la integrazion de mutons extracomunitars te nostes valedes, ence te Souramont.
Sce i raprejentanc dles istituzions ladines ne tol nia l’iniziativa, da chi messonse pa spo nes aspeté aiut?

Marco Pizzinini,
Vizepresident dla Union Generena di Ladins dles Dolomites (UGDL)

Al me plej(0)Al ne me plej nia(1)

383 iadesc liet

Ortiede inant tres

Scrive n comentar a revert de "Scolina: degun contat"

Scrive n comentar