Ciasa de Palsa do l recurs

Albert Pizzinini de Ladins Dolomites, tol endò posizion sun la chestion dla Ciasa de Palsa dla Val Badia a San Martin de Tor, do che al é gnù fora la sentenza.

Al criticheia che les speises legales é vegnudes compensedes.  L recurs dla Bioc Bau, do ne avei nia davagné la escrizion di laours, ova gaujé bendebot de speisa per la aministrazion dla Ciasa.
„Do avei abù la ocajion de lieje la sentenza con chela che al é gnù sciuré zeruch l recurs dla ATI Bioc contra la dezijion dla aministrazion dla ciasa de Palsa de San Martin de Tor che à dé via i laours a na autra impreisa vàl debujegn da se fé valch pensier“, dij Albert Pizzinni de Ladins Dolomites.
„La Bioc Bau con raprejentant legal tla persona de Paula Bioc Gasser, tamben vizesourastanta dla SVP, à prejenté na oferta che ne respeteia nia les ghiranzes tecniches damanedes da la Aministrazion dla Ciasa de Palsa. La cossa enteressanta é che la Bioc Bau à prejenté na oferta miourativa. Ciodì che la Bioc Bau ae prejenté na oferta miourativa canche l’aministrazion dla Ciasa de Palsa à dit clermenter tla escrizion che ala ne essa nia azeté de tel ofertes per na chestion de costiment, é demarevueia. O che la Bioc Bau se ae falé, ma chel é rie da creie per na impreisa che laora bele da agn o che an à fat aposta a mete dant chesta oferta en funzion de n recurs che an minova de davagné. Fat él che les speises legales é gnudes compensedes y che i laours é gnus tegnus su bendebot die, con n dann a stim de passa 100.000 euro per la aministrazion dla Ciasa de Palsa da San Martin, costiment che messessa sen gnì sourantout dai Comuns, ence sce plu iadesc ti él gnù damané a la Bioc Bau de lascé tomé l recurs a na  moda de evité danns per i comuns. Chestes prieres ne é endere nia gnudes toutes en consciderazion“, scriv Albert Pizzinini.

Al me plej(0)Al ne me plej nia(1)

842 iadesc liet