450 mile euro per derturé les uties da mont
Les uties ne é nia demé na adassosta tles montes, ma infrastrutures importantes per l turism y per la segureza dla jent
12 uties da mont giata contribuc da la Provinzia de Bulsan per laours de miorament y engrandiment de si locai. Sun enteressament dl assessour per chestions alpines Werner Frick, à l Govern Provinzial dé pro contribuc de endut 450.000 Euro a cater uties da mont privates y a ot uties da mont dl CAI, l Club Alpino Italiano. Cun i scioldi déssel vegnì daidé da curì les speises per i laours de mantegniment y eventualmenter engrandiment cualitatif de locai y dl servisc pité tles uties da mont, n servisc che ne vegn nia demé pité a la jent dl post, ma dantaldut ence ai turisc´ che vegn a se gode l temp lede. Les uties da mont ne pieta nia demé na adassosta anter les montes, ma raprejenteia ence na pert importanta dles infrastrutures turistiches te Südtirol. Sun la foto: la utia de Fanes.
Les uties vegn chirides su gen dai vacanziers, dij Frick. Per chesta rejon se tràtela de tegnì endertura y ben les uties da mont y samben ence i trois y les semenes. An ne dess nia tralascé, enscì Frick, l aspet dla segureza tles uties. “Con i trois amarscés endertura y les uties enjignedes ite sciche al auda con la funzion de ester n pont de referiment per chi che va da mont su, deiden dessegur prò truep a la segureza tles montes” enjonta l assessour Werner Frick. (osp)
(0)Al ne me plej nia
(0)29 iadesc liet