SMG, deguna reazion, deguna corezion
Ladins prejentés dret puech y ence chel puech falé
La SMG, la sozieté per l marketing de Südtirol, finanzieda con trueps dinés publics, n’á deguna lerch per l ladin. Chilò é la SMG tla bona tradizion sudtiroleisa. Ma dret puecia – y en pert faleda é ence l’informazion che vegn deda sun i ladins. Die alalongia àn chirí debant informazions plu menudes sun i ladins: l’imaja che la SMG dova, fova chela de na provinzia bilinguala (y é en bona pert éla dutaorela enscì). Pro n convegn a La Ila fòvel vegnù critiché che les informazions sun i ladins da ciafé sun la homepage dla SMG, fova dret speres y en pert ence formuledes daspavent mel, tant da ester faledes.
Ben, sen él n pice cianton, dret pice, olàche al é ence informazions sun i ladins. Informazions sciche “Das Ladinische gehört zu den romanischen Sprachen und wird heute noch im Dolomitenraum von etwa 18.000 (sic!) Muttersprachlern gesprochen.” Nia veir. Nos ti ovan scrit al SMG de chest fal – dant da meisc. Reazion deguna, deguna corezion.
Laprò él ence n file audio da se scuté su – ma con n fal: “la nosta cultura” ne dìjen nia per ladin, an dij “nosta cultura”. L SMG ciafa finaziamenc auc assé, an essa l muet y l dovei da dé di ladins informazions dretes. Y can che zacai scriv che al é n fal, almanco comedé. (mt)
Liam: http://www.suedtirol.info/Culturonda/DE_Entrypage.html?Group=EntryPage/Pleasure/Culturonda. Cliché sun l filmat n. 7.
(0)Al ne me plej nia
(0)35 iadesc liet