Invit dl Papa a chirì la gheneda interioura

 

L Papa: ne sofoion nia l Nadel tla fuera y tla confujion!

L secret de chesta festa vìven tres umilté, gheneda, marevueia y liegreza.

(if) “Depierpul che i fajon les ultimes comedures pro la cripela y l legn da Nadel enjignondenes ca nosta anima a vive intensivamenter l mister daidés dal ejempl dla Madona!”. Chest é l consei dl Papa ai catolics per se arvejiné tla dreta maniera al Nadel. Enscì ál perdiché encuei te n state de sanité mesan y scialdi fluid tl rejoné entratant l Angelus dant da n valgugn cenc de fedei abinés adum sun Plaza San Piere. L Papa à dit che an mess empruma daurì sia anima per podei vive chest gran moment dl mister dla fede.

Per capì a fonz l mister dl Nadel  ál envié de se recordé dla desponibelté plena de Maria per l dessegn de Die. Maria, la oma per ezelenza, deida, enscì l Papa, a capì les paroles-clef dl mister dla nasciuda dl fi divin: umilté, gheneda, marevueia y liegreza. L Papa envieia dantaldut a l’umilté, a na vida che Die posse giaté lerch te nosc cuers, gonot enscuris da la superbia. Al recorda l valour dla pesc, dl chiet per podei scuté su les cianties di agnoi y la ousc dl Pice Bambin, zenza i sofoié tla fuera y tla confujion. La nascenza de Gejù Crist ilumineia duc chi che é tla scurité y tla ombria mortala. Chisc é stés en curt i pensiers de reflescion dl Papa per chestes Festes da Nadel.

36 iadesc liet