Ai 12 de jené garejeda cun la ciaspes sun Mont de Pana - prima cumbinazion cun l Extrem Marathon
Nce te Gherdëina à pià pé na disciplina sportiva nueva. L ji cun la ciaspes ie n’alternativa per l inviërn che ti pieta n cuntat plu strënt cun la natura sibe a chëi che va gën da mont su che no a chëi che ti sa bel sa sauté. Do la bona sperienza dl ultimo inviern mët l’Atletica Gherdëina a ji per n dumënia ai 12 de jené 2003 la segonda edizion dl Val Gardena Ciasp sun Mont de Pana a S.Crestina. N à udù che la nuvità ie unida tëuta su de bon uëdl sibe da chëi da tlo y nce dai truep concurënc che ie unic da oradeca per garejé sun na raida de 5 km sun nëif batuda.
La “Val Gardena Ciasp” ie na manifestazion che uël ti pité a uni un na bela sperienza de devertimënt, sport y natura. Per chësta rejon uniral nce fat defrënta categuries per chëi che fej garejedes de n cer livel y per i concurënc dl tëmp liede. Per la sgonda dumënia de jené aspieten l campion de chësta disciplina Antonio Molinari dl Trentin, che ova bele venciù l ann passà te Gherdëina. Mplu vëniel sun l post mprestà ora ciasps da garejeda. L ie udù dant de fé na sëula raida de 5 km cun n deslivel de plu o manco 200
metri.
La gran nuvità:
Per l prim iede an ulù tré adum la garejeda cun la ciaspes y la garejeda de sauté da mont sù, “Extrem Marathon”. Aldò di tëmps tla doi cumpetizions uniral metù ju na tlassifica speziela che premieia l concurënt plu sterch a distanza de bën 9 mënsc. A duc chëi che fej pea chësta cumbinazion nueva ti uniral lascià do l priesc de iscrizion pra l “Val Gardena Extrem Marathon” ai 21 de setëmber 2003.
Nfurmazions plu avisa sun la garejeda cun la ciasps giaten cherdan su l presidënt dl Atletica Gherdëina, Othmar Senoner al 328 689 83 45 o scenò tl internet sota http://www.atleticagherdeina.it/ . La iscrizions vën tëutes su tl ufize de turism de S.Crestina, nr de tel. 0471 79 30 46 y e-mail s.cristina@val-gardena.it .
(0)Al ne me plej nia
(0)47 iadesc liet