Enrescida dl foliet economich CIO

 

Gran otimism tl setour dl’informatica

Na enrescida dl foliet economich CIO empermet per l 2004 na chersciuda dl 6% di investimenc tl setour informatich

(if) A la fin dl ann passé él vegnù descedé otimism con zacotantes enrescides de marcé tla industria dla informatica. Dutes é a una che les investizions tla infrastrutura informatica dles impreises dess jì chesta outa suvers. L foliet economich CIO sona la medema ciampana te n sie stude: aldò de chesta enrescida dess les investizions cresce mesanamenter dl 6%. Dant da puech él ciamò vegnù dit, per ejempl da la “Prudential Equity Group”, che per gauja di mendri davagns messòvel vegnì demendrì les investizions tl’informatica. Sen s’à l umour out, an se aspeta de majeri davagns y perchel ence n aument dles investizions tla infrastrutura informatica aziendala. N segn che ne lascia nia pro dubes: ti ultims dodesc meisc é les speises per enjigns informatics chersciudes dl 3,4%.

Belau l 58% di intervistés à dé dant de volei spene deplù per la segurté de si sistems. Propi l setour dla segureza informatica é chel con l majer potenzial de marcé y de chersciuda. Demé l 44% planificheia de sparagné de chest vers. Belau l 42% vuel investì tl hardware y l 38% tla infrastrutura software. L 12% destineia sie budget informatich al svilup de aplicazions gestionales adatedes a les ghiranzes de internet. L 9,5% dl volum di afars che les impreises tirarà ite ti proscims dodesc meisc dess resulté da afars tres internet.

38 iadesc liet