Zircui per jent atempeda tres plu benvegnus

I mudamenc economics y soziai te Fascia à valgamia straout les relazions soziales y les ocajions de sozialisazion dles persones. Un di problems entres plu maiours é te Fascia chel de ti dé respostes a la jent de eté sie per cie che reverda la ciasa de paussa sie per autri momenc de sozialisazion. Zacan se tolòven cotant deplù dlaorela per fé vila.

L vive comporta naturalmenter momenc de crescimonia, de cultura, de orela curta y de vueia de sté adum. Ti ultims temps, souraldut ti ultims 20 agn, do l gran svilup economich te Fascia, ne podòvel nia auter che sauté fora chestions liedes a la calité dl vive, al “fé vila” y a la chestion dla jent de eté y la sozialisazion. A chest fin él nasciù sun l tegnì de Fascia deplù zircui: empruma ja Moena y plu tert a Poza. Ai pieta desvalives scomenciadives che va te chesta direzion. Una dles plu apriejedes é dessegur l’université dla terza eté che vegn da agn metuda a jì a Poza per endrez dl Comprensore Ladin de Fascia y dla Provinzia de Trent. I zircui dla jent de eté à abù bendebot n gran resson. L debujegn de sté deberieda y la chestion dl temp lede é atualiscims. N contribut fondamental vegn da chisc zircui a na vida che chesta sajon dla vita ne sie n temp zenza segnificat ma alencontra n moment de crescimonia culturala y soziala. L’ultim zircul metù en pe é chel de Ciampedel che é vegnù enaodé l’ann passé da d’auton. Al à sia senta tla ciasa dl Comun de Ciampedel. L president é Lino Cianciulli confermeia l bon scomenc dl zircul nuef che dombra bele setanta scric ite y che scomencia a mueve via i prums varesc con scontredes tla senta soziala, valch picera marena y autres piceres ativités per fé vila. Al é n scomenc dessegur empermetent che ti dà na resposta ai atempés dl’auta val de Fascia. Te chest zircul él laprò persones de Ciampedel, de Cianacei y de Mazin. L projet vuel damprovia se smaioré con tres deplù scomenciadives nueves. Domenico Volcan.

Al me plej(0)Al ne me plej nia(0)

2 iadesc liet