L vizepresident Carlo Willeit à vijité con l Presidium dl Consei provinzial de Bulsan l Parlament y la Université dl Bayern
Ai 20 y 21 de merz passés à la presidenza dl Consei provinzial de Bulsan fat n viade de rapresentanza y de conescenza a Minca. La pruma destinazion dl presidium tl Bayern é steda na vijita a la université Ludwig-Maximilians, na strutura importanta, con dimenscions nia da paridlé con chela da Bulsan. L’université, fondeda dal 1472 a Ingolstadt y spo plu tert conduta a Minca, à aldidancuei plu che 40.000 studenc y é una dles maioures universités todesces.
Ala à contac con deplù universités talianes, anter l’auter con chela de Trent.
Gen toléssela su raporc ence a la université da Bulsan, conscidran l gran numer de studenc sudtiroleisc che studia lafora.
Tl Istitut dal lingaz todesch per nia todesc él vegnù fora na discuscion significativa sun l lingaz ingleis, desche al sburla da na pert i lingac europeics, nia demé tles relazions ofiziales, ma ence desche lingaz dla oma. La situazion predominanta dl lingaz ingleis n ejempl, che pò vegnì reporté a truepes situazions locales y al va perchel debujegn de pensé soura y se salvé te vigni post y ciamp y te dutes les situazions, la funzion primara de nost lingaz.
Tl Parlament bavareis che à de bones relazions con l Consei provinzial de Bulsan, à i ghesc’ sudtiroleisc ejaminé plu sot truepes tematiches belau nia azichedes entratant encuntedes da dant, anter l’auter la partezipazion di parlamenc regionai al prozes de unificazion europeica, i raporc anter conseis y jontes y la regolazion dles sentedes dles comiscions, che é, tl Parlament bavareis davertes per l publich.
Nia demé les endunedes ofiziales con l president bavareis Böhm é stedes de utl, ma ence l program cultural, che con les vijites al museum d’ert moderna y a la Opera de Stat, é sté dret de plajei y à dessegur daidé da renforzé l liam anter i doi parlamenc. (if)
(0)Al ne me plej nia
(0)2 iadesc liet