“Transdolomites” propon mesi alternatifs
Convegn sun l trafich tegnù ai 20 de otober a Vich de Fascia – Esposizion: Glaciers sot a viere – Deplù servisc de trasport publics
.jpg)
Che l trafich motorisé tles Dolomites, sun joufs y sa mont en general sibe n problem valgamia sentì ne é nia valch da nuef: la nueva é chela che an vuel chirì soluzions al problem. De chisc argomenc se festidieia da n valgugn agn ence n clap de persones con a cef Massimo Girardi de Vich/Fascia. Ai se dà ju tres sia scomenciadiva “Transdolomites” con i problems dl trafich y per na mioura cualité de vive.
Per endrez de cotantes assoziazions y enc publics él vegnù tegnù a Vich l convegn “Transdolomites 2006” ruvé a la 4. edizion y desche les autres outes con al zenter desche tema i problems de transiament, dla mobilté, dla energia y dl ambient. L convegn dl 2006 à dantaldut trat na soma dl convegn da dant dl 2005. An à lascé al savei cie che é vegnù fat y cie projec che an se tol dant dl davegnì. Tl convegn 2006 él vegnù porté dant plutost propostes, do che agn a la longia él vegnù analisé i problems liés al trafich y al turism. Endana l convegn à rejoné Marianna Elmi dl Ökoinstitut de Sudtirol che à porté dant na sintesa di resultac dla dombrazion dl trafich tla val y sun i joufs fascians fata dl 2006. Chisc dac ne é nia na scempla elencazion de numers ma n muet per conesce miec les dinamiches dl trafich y de vedei ciunes che podessa ester les mioures soluzions aldò dl stude. L resultat final dla enrescida vegnirà prejenté plu inant endana na giorneda aposta dedicheda demé a chest stude.
Da recordé él ence la volonté di promotours dl convegn de vegnì liés ite te n projet europeich de mobilté y de savei desche l’Union Europeica (UE) vuel se mueve sun chest ciamp. Te chest spirit de colaborazion à rejoné Massimo Marchesi dla Comiscion Europeica dl ofize de Milan.
Dut adum na giorneda ricia de enrescides, de studes y de propostes che se à sclut ju con la enaudazion dla mostra “Ghiacciai in serra / Glaciers sot a viere” che resta daverta enfin ai 26 de otober tl Museum Ladin de Fascia. La mostra tol ite 28 de gran tofles olàche an veid desche i glacions se deleiga y smendresc tres deplù ti ultims agn.
Co-organisadours y co-sostegnidours dl convegn é stés: la assoziazion Transdolomites, i comprensores de Fascia y de Flem, la Apt de Fascia y Flem, la Provinzia de Trent, la Comiscion Europeica, l Parlament Europeich, la Antenne Europe Direct, l Comun de Poza de Fascia, l Consorz Eletrich Pozza, la Fassa Coop center, Trentino Trasporti y l Istitut Cultural Ladin. (dv)
(0)Al ne me plej nia
(0)1 iadesc liet