“L atestat de matrimone”
Premiera en sabeda, ai 27 de merz tl salf “Domene Moling” a La Val, da les 20.30 – La rejia é tles mans de Bernardetta Nagler con assistenza de Matteo Rubatscher, la traduzion é gnuda fata da Lydia Zingerle
En curt la tramadura: Ella (Virginia Vallazza) y Daniel Brozowsky (Helmut Deiaco) é maridés da 25 agn. Sia muta Vicky (Esther Moling) vuel maridé Robert (Hansi Rubatscher), l chef calcoladour dl ofize de statistica, ma la oma de Robert vuel empruma avei l atestat de matrimone di genitours de Vicky. Chest document pèrel che ne sie nia plu da giaté y Ella y Daniel n’é nia plu tant segurs de ester ben jus te comun a lascé zertifiché sia union. Enscì ròmpel fora n conflit, an pensa a la separazion. Ma spo él ciamò Tomy (Raimund Frenner), l laorant de comun …
Rosa, la vejina (Veronica Vallazza) vuel samben ence n puech daidé do!
Te sia comedia satirica, plena de ironia, mostra Ephraim Kishon l’escalazion de n conflit matrimonial. An se tira dant duc i fai de 25 agn de union. Trami ne vuel nience plu ester maridés, an se dejidreia la liberté de n single. Mo an ne la miena nia tant sun l scer. Vignun aspeta demé che l auter feje l prum vare …
L teater gnirà raprejenté per l prum iade en sabeda 27.03.04 da les 20.30 tl salf “Domene Moling” a La Val. Dedò saràl ciamò da vedei en domenia 28.03.04 da les 17.00, vender 02.04.04 da les 20.30, sabeda 03.04.04 da les 20.30 y lunesc 12.04.04 da les 20.30.
Les chertes pò gnì apostedes dantfora al numer 0471/843150 o 339/1815514.
(0)Al ne me plej nia
(0)3 iadesc liet