Elsa Zardini meina sen l ciar dla Generela
Tres l resultat dassen positif dl referendum da souramont raprejenteiela na “Ladinia renforzeda” da souramont
Elsa Zardini, presidenta dla Union di Ladìs de Anpezo, é la presidenta nueva dla Union Generela di Ladins dles Dolomites. Chest é l resultat dla reunion generala tegnuda dantenier a Urtijei. Ala coriva la enciaria da vize-presidenta y fova bele presidenta ad interim ti ultims meisc do les demiscions de Michil Costa. Do Igi Menardi (1981-1983) él la seconda outa che Ampez sourantol la presidenza tla Union Generela. Al ne fova degun contracandidat.
Elsa Zardini fova, deberieda con les presidentes dles unions di Ladins de Fodom (Cristina Lezuo) y Col (Paola Agostini), firmatara dl apel ai trei comuns ladins de souramont de endì l referendum de destach da la provinzia de Belun che é ju fora positivamenter de otober dl 2007 con entourn al 80% de scì. Elsa Zardini pò enscì conté politicamenter con na “Ladinia da souramont” renforzeda y tamben sun Fascia olàche la Union Autonomista Ladina (UAL) à davagné les lites provinziales.
Degun sostegn politich tla chestion dl referendum y degun reconesciment ofizial ne vegniràl depierpul nience ti proscims 4 agn da la raprejentanza politica ladina a Bulsan, olàche la Svp à ciamò n iade arjont la maioranza dles oujes tles does valedes ladines.
(0)Al ne me plej nia
(0)1 iadesc liet