Union Generela di Ladins dles Dolomites

La Generela se dá n statut nuef  

Ai 12 de fauré Assemblea Generala dla Generela a Urtijei con prejentazion y aprovazion dl Statut Nuef – Istitut Ladin y Istitut Pedagogich con n raprejentant? –  La Generela podessa se slarié per tó ite la Union di ladins de La Rocia tl Beluneis

L Consei dla Generala à tegnì en sabeda a Reba na senteda per enjigné ca l’adunanza generala che gnirà tegnuda ai 12 de fauré a Urtijei. Doi é stés i argomenc de majera discuscion: la mudazion dl statut dla Generala tl vers de lascé pro d’autri sozes y, secont, i candidac potenziai a l’enciaria da president dla Generela. Per cie che reverda la daurida dl Statut nuef dla Generala ence a d’autres unions y a enc publics, sce ai damana de vegní touc su, ésen stés a una de lascé vegnì pro la Comunanza Ladina de Bulsan, i Ladins Dlafora y d’autres unions.  Da manciancia: l president Nani Pellegrini, Fabio Chiocchetti y Egon Vinatzer.

La Comunanza pér che ae fat bele dant en valgugn agn domanda de gnì touta su desche comember, ma ala ne jiva nia, ajache al messova naouta vegnì mudé l statut. Sen che l Statut é vegnù mudé, al mancia demé plu l’aprovazion dl’adunanza, pòn zenz’auter dì che la cossa garatarà y che  ala vegnirà touta su con duc i derc che ti speta ai sozes, ence l dert d’ousc. Al pér ch’al ne sie nience plu problems per tò  i ladins de La Rocia, sce ai damana y chest é dessegur n gran vare inant sun l troi dla unité, o almanco sun chel dla volonté de tegnì adum y de i destaché y desferenzié dai ladins nia storics de Belun. An spera che l’adunanza dae pro ai 12.2.2005.
Plu complicheda y ria la chestion dla partezipazion di istituc culturai, de chel pedagogich y dles does intendenzes: chela de Bulsan y chela de Fascia. L Statut nuef ti pieta o miec ti resserveia a chisc enc publics n post de raprejentanza tl Consei dla Generala,  ma zenza l dert d’ousc. Podei tò pert zenza dert de ousc vuel dì ne podei nia tò su responsabeltés y vegní conscidrés na sort de “sozes onorars”. Contra chesta limitazion se bat dassen l raprejentant dla Val Badia, Werner Pescosta, che volessa che ai vegnissa touc su desche la Comunanza y i Ladins Dlafora…, desche “sozes ordinars”. La dezijion ti toca a l’adunanza de fauré.
Ciun pa l president nuef dla Generala? Al moment resta Nani Pellegrini l soul candidat. Al pér ben ch’al slumine tl ciel dla Val Badia valch cometa, ma an ne pò nia fé l inom,  ajache an ne l conesc nia. Cie bel coraje! An pò dì che Pellegrini à slarié fora les responsabeltés  y à crié plu discuscion. Souraldut à giaté la Generala n majer resson a livel politich, ence demé bele tres chestes ultimes encontedes con i presidenc dles Jontes. Deberieda pòn y déssen arjonje tres de plu. (uc)

2 iadesc liet