Rut Bernardi te n cheder televisif
Ala à porté l lingaz y la cultura ladina anter nosc vijins, nia demé a Bulsan, ma ence tla Austria
La Rai Tv Ladina mostra en chesta juebia, da la mesa da les nuef da seira, n documentar sun la scritoura Rut Bernardi. Dret conesciuda é Rut Bernardi gnuda ultimamenter anter l publich todesch con si „doi menuc de ladin“ tl radio todesch che à abù dret n gran resson.
Rut Bernardi.
L’ativité de Rut Bernardi va endere cotant soura i cursc fora, ala é na portaousc de lingaz y leteratura ladina foradecà, zenza mai tomé tl folcloristich, zenza mai tomé tl cliché, o tla superfizialité. Ala à porté l lingaz ladin y la cultura ladina dai vejins de lingaz todesch dantadut, nia demé tla provinzia de Bulsan, ma ence tl Austria, olache ala liej dant sies operes leterares ladines demé per ladin. L publich se mostra enteressé per la melodiosité dal lingaz. Con sia copa dal cafè dla sabeda – l liber da piz a cianton -, é Rut Bernardi endere ence na portaousc de leteratura da foradecà tla Ladinia.
L retrat televisif sun Rut Bernardi proa da dé na picia sintesa de sia biografia, de sie pensier cultural y de sie pensier creatif – n retrat de na chert d’ora zirca che mess romagne nia complet, mo che volessa dé n prum impuls a se dé ju con chest personaje enteressant dl mond cultural ladin.
Al me plej
(0)Al ne me plej nia
(0)
(0)Al ne me plej nia(0)2 iadesc liet