Bries y scioldi spidicés te vocabulars idiomatics empede tl standard – Duta la polemica y stritaria envieda via da la SVP de Gherdeina
La delibera de Mussner y l arat dl Istitut fej tres plu marevueia ence ai todesc tla provinzia. An vegn ence a conesce deplú particolars che rejona contra la delibera y contra l’empostazion dl Consei dl Istitut. Per ejempl la Fondazion dla Cassa dl Sparagn che ti à dé milions al Istitut Micurà de Rü per dé fora i vocabulars idiomatics ladin Val Badia y Gherdeina, dessegur de utl y n gran laour. La Fundazion à endere racomané plu iadesc – ciamò tres sie vedl president Hans Rubner – de mete al prum post finalmenter l laour sun l standard ladin, sun “eine ladinische Schriftsprache/einheitliche 
Schriftsprache”, “recordedeves chest dess ester l travert final” àl dit. Chest àn podù audì dai medems interessés che à laoré pro l vocabular. Rubner à propi racomané de ne sciuré nia demez scioldi te publicazions che sarà tost sourapassedes n iade che al sarà dantman l lingaz standard y a chest déssen souradut pensé per ne fé nia laours dopli. I todesc de Sudtirol che adora ence n standard scrit, l “Schriftdeutsch”, conscidreia la soluzion dl standard sciche la cossa plu naturala al mond y a l’auteza di temps. La presidenta dl Consei Provinzial Alessandra Zendron se à damané l standard per la prejentazion dl Consei.
Dla medema minonga ence l president dla jonta Durnwalder che à dé pro entratant la prejentazion dla delibera che al se trata de na soluzion provisoria y perchel déssen pensé al standard. An veid che la SVP todescia ne n’à degugn problems de chest vers y che duta la polemica y stritaria é pieda via y depen da chi dla SVP de Gherdeina con sies posizions estremistes per cie che reverda l ladin. L sclaf plu gran a Mussner y Istitut vegn propi dal Consei Provinzial che à dé fora l’ultima brosciura de presentazion sul Consei y sun sies ativités propi tl ladin standard. A cie moda ne é pa na tel delibera che azica tant damprò te sia natura duta la mendranza ladina, nia vegnuda prejenteda denant al Consei Provinzial che à bele anuzé dantfora desche ofizial l standard. Cler che Mussner met plu averda ai amisc de Gherdeina che ti darà la ousc che no ai membri dl Consei Provinzial.
(0)Al ne me plej nia
(0)34 iadesc liet