Teater tles valedes ladines

Al é emportant che l teater sie vif y busient

La vera anter tradizion y modernité – La modernisazion gnirà de gre en gre

de Valentina Kastlunger

Do mia minonga é la situazion dl teater ladin encuei valgamia bona, rica de vitalité ma ala mostra tema ti confronc dles novités. L teater é tles mans dles unions y de valch scomenciadiva personala. An enconta persones che à studié teater a livel universitar y che viv sen tles valedes y che fej dl dut per mete en pe valch dajan enscì bendebot de sburla ence a les unions tradizionales dl teater.

N teater zenza critiches

Che l teater sie n meso cultural fondamental per mantegnì y dé inant l lingaz ladin é fora de discuscion. Y an ne pò nia che ester a una con cie che al à dit l assessour Florian Mussner en gaujion dl forum cultural vegnù tegnù ai 28 de otober a La Pli de Mareo che se à dé ju con l teater. Mussner à sotrissé la emportanza dl teater per svilupé inant la cultura ladina. Con dert se baudia regissours y joblers che al mancia tesc’ per ladin y che ala se trata dantaldut de verscions dal todesch o dal talian. Ma de chest é ence de colpa i autours enstesc che se à souradut festidié de fé rì la jent empede la fé pensé, lascian da na pert vigni pedia de critica a la sozieté, ai partis, a la politica, a les racomanazions per i posc’ publics, a la sanité y e.i. Ti ultims teatri fòvel valch critica demé contra les vedles tradizions dla Gliejia. De chest vers pòn ence rejoné mel, ajache al ne é nia na speranza de contribuc. Dessegur ne rejonaràn mai mel dl partì de Mussner, ajache dailò tomassa atira i contribuc. Propi n bel coraje. (ji)

Da chilò enfora la tema de chestes unions che la tradizion vae en spidic, sostituida da n lingaz plu modern y manco autentich. An à n pue tema dla profescionalisazion dl teater con l pericul de perde chel spirit originar che à animé les unions a fé teater con pascion, da la vueia de fé valch deberieda, valch che fej rì la jent y che sie lié a sie paisc. Nia da die él sauté su da plu pertes la domanda sce al é dret resté demé pro comedies de teater popolar, o sce al ne sie nia l caje de vaghé formes nueves, plu modernes: la vera anter tradizion y inovazion.
Do mia minonga él dret che l teater ladin se deure a trois nuefs a na moda da crié diversité y dialogh anter i atours dl teater y poester ence valch contrast. N pue de tension fej demé ben, dà n nudriment nuef. An n’à nia bria de avei tema dla diversité ajache ala é pu segn de democrazia. L futur dl teater ladin restarà inant tles mans dles unions teatrales de paisc che fej dessegur n laour emportant per sia comunité. Pro l Teater da la Val, olàche i à podù laoré desche regista, fòvel bele truepes novités y souradut gran organisazion y capazités de tò ite n grumon de persones. N projet deberieda che é garaté na cossa straordinara y che à abù n suzes y n publich straordinar, che truepes compagnies de teater t’envidieia. Les unions de teater n’à nia bria de mudé per forza sistem, tems, stil y tesc’. La modernisazion gnirà de gre en gre, l mond ladin n’é nia plu demé tradizion, al ne esisteia nia plu demé la sozieté paurila, avisa desche te nosta cultura n’él nia plu demé liejendes. L mond ladin ne dess pa nience ester demé modernité, economia, turism, ma per fortuna: tradizion y modernité.
I me aode che desche persona che va a scuté pro n teater de podei vedei na comedia popolara na seira y na autra seira na performance de teater de archirida. Emportant él che l teater sie vif y chest suzed canche chi che l fej à valch de autentich da dì.

Al me plej

(0)Al ne me plej nia

(0)

2 iadesc liet

Ortiede inant tres