La globalisazion sburla a se mete adum
La “medejina” per les vals ladines mess vegnì chirida te na majera colaborazion
de Lorenzo Soratroi
(if) A ciaval de does edemes se à i ladins entourn l Sela abiné adum ben per doi iadesc en ocajion de zelebrazions de gran valuta storica: i 450 agn dla fondazion dl santuar de Weissenstein y la santificazion dl pater Freinademetz. La religion, la tradizion de cristianité di Ladins deida ciamò n iade chesta popolazion despartida, a se enconté y a renové chel liam che les à tegnudes adum per secui. Ti dis passés é vegnus convochés i ombolc y i presidenc dles assoziazions turistiches dles cater vals te Gherdeina per descore fora i problems di auti che sofoia i joufs y per envié via n azion deberieda per solezité i sciori che vegn adalerch a adoré demanco l auto. Ence l’economia sburla per na colaborazion anter chestes cater valedes. N iade passòven per i joufs con bestiam da vene, encuei é l turism che fej mueve n grumon de scioldi, de interesc y de bujegns de colaborazion. Tres deplù se enténen che an fej da soui ben puech. La globalisazion sburla a se mete adum.
(0)Al ne me plej nia
(0)2 iadesc liet