Selva: lites comunales 2005

 

Roland Demetz vuel jí tla terza legislatura 

Selva é un di puec comuns te Südtirol che ne á nia n ombolt declaré Svp

Tl comun de Selva giata les listes de comun contures cleres. Al sará does listes y doi candidac da ombolt: na lista de paisc y na lista Svp. Dant en valgugn dis á l grup Svp nominé Diego Bernardi, 42 agn, impresar y manejadour dla scola de schi dl luech sciche candidat-ombolt. El dess bate Roland Demetz tla “garejeda” per la enciaria da ombolt.  Roland Demetz ultim vuel endere arjonje la enciaria con na lista de paisc y nia plu con na lista “Ladins” coche da les ultimes lites comunales. La Svp é tl enjigné na lista con trueps candidac, ma nience l ombolt en ciaria ne é sté chiet. Roland Demetz é sté bon de tré da sia pert valch esponent Svp de jonta, enscí l assessour Heinrich Senoner. L obmann Christoph Perathoner ti á manacé la esclujion dal partí, sce chest essa da suzede. Selva, l paisc sot Meisules, é un di gragn comuns dla Ladinia con passa 2.500 abitanc y gran potenzial economich-turistich.

La Lista “Ladins” ti tegnirá bonamenter la sciala a Roland Demetz desche  candidat da ombolt, ence sce chest ne vuel nia plu candidé sot sie simbol, ma con n simbol de lista de paisc. Les relazions ne é nia plu les mioures, dantaldut do la desfata litala dl 2003 dla lista “Ladins”. La chestion se entravaia per la Svp che vuel a duc i cosc’ davagné zeruch la “sciadrea” dl ombolt, la posizion de prestisc. Chesta ti fova juda a perde do che Henrich Perathoner se ova retrat y che sibe Florian Mussner, atual assessour provinzial ladin y Rudolf Mussner, esponent turistich, trami Svp, ne ti l’ova nia fata contra Roland Demetz.
 
 
 

1 iadesc liet