Selva: lites comunales 2005 – lista

Enseira án tout la dezijion definitiva de mete en pé a Selva na lista “Ladins” per les lites comunales 2005. Carlo Willeit: “N iade onse bele 11-12 candidac segurs, anter chisc i conseiers da sen Claudia Bertuolo y Flavio Mussner y 2-3 nen ruváral permez”. Candidat da ombolt é Carlo Willeit. Sun la domanda ciuldí che an á tout la dezijion de jí do si trois, y de ne sostegní nia l candidat da ombolt Roland Demetz y sia lista de paisc, díjel che “al ne fova nia meso de ruvé anencef, de arjonje na acordanza clera”. Ence a S. Cristina végnel metú su na lista “Ladins”. Willeit é dla minonga che al é miec se prejenté ence a livel comunal con listes de partí y nia con listes de paisc, davia che la posizion politica resulteia plu clera.

 

Per Willeit é Selva n simbol dla politica comunala di “Ladins” che á na valuta soura i confins de comun fora. Al fossa dastramp da moié da lascé ester dut, davia che l ombolt da sen, Roland Demetz, ne vuel nia plu se reconesce pro l moviment “Ladins” y  se prejenteia con na lista de paisc a mesa streda: tiran da una na pert valch esponent Svp sun sia lista y volan da l’autra pert avei l sostegn di Ladins. Da chest él nasciú n gran contrast con la formazion di “Ladins”. Al ne fova nia plu meso de se coordiné, no per cie che reverda i candidac, no per n program y ciamò de manco per idees de laour te jonta.

Ofizialmenter vegn la lista “LADINS” prejenteda ai 1 de auril, da les 10,00 dantmesdí, tla ustaria de Val te Selva.

A mete adum na lista  “LADINS” ésen ence tl laour a S. Cristina y desche tles does legislatures da denant  a Urtijei, oláche an á arjont da les ultimes lites comunales 3 conseiers. “De bones listes con trueps candidac” dij Willeit, vedan che l moviment peia endò via dal bas, ti comuns y ne se á nia destudé via.