Relazion dl conseier ladin Luigi Chiocchetti

 

La informazion per ladin va ciamò inant a “soglot”

Relazion dl conseier ladin Lugi Chiocchetti en gaujion di Dis di media ladins a Cianacei

“Dis di media ladins a Cianacei, dai 19 ai 21 de mei 2005”: Do mia minonga se trátel de na scontreda de gran valuta ajache ala é vegnuda metuda a jí do n moment de reflescion entratant l meis de dezember dl ann passé con raprejentanc ladins y rumanc per vedei de mete a jí na ocajion de confront y de colaborazion con l fin de arvejiné ladins y rumanc y con l obietif de se conesce miec y prové de mete a jí adum azions coordinedes.

L conseier ladin Luigi Chiocchetti.

 

Rumanc y ladins á defat truepes cosses deberieda sibe sot l profil cultural che linguistich y sozial. Nos vivon te does realtés de mendranza che  é  a mie vedei dant a problems dret valifs y vejins: i pense per ejempl ai desvalifs idioms che vegn rejonés fora per les valedes, i pense al reconesciment dl lingaz ladin y rumanc a livel ofizial y istituzional y donca ence al debujegn de mete a jí azions per fé cresce l lingaz te sie “status” y te sie “corpus”, per podei l adoré a duc i liviei dl’aministrazion, sibe locala che ence raionala o ciantonala. I pense al debujegn de n lingaz de mendranza desche l nost che, a desferenza de d’autri lingac, desche p.ej. l todesch o l talian, ne à degun “background” de referiment y donca méssel giaté na sia streda per cresce, se svilupé y ruvé a se modernisé, zenza resté endere te chest prozes subordiné ai lingac de maioranza plu stersc che nos on entournvia, cie che ruvassa a porté nosta mendranza ladina a se desfanté.

N aspet fondamental y strategich te chest contest é chel de mete a jí momenc de confront y de colaborazion sibe per se conesce miec che per se mete en consavei dles desvalives azions che é en ester ai fins dla defendura dl lingaz de mendranza, sie per se confronté y se entene miec sun coche an pò ruvé a mete a jì na politica linguistica frutoula, bona de conduje a resultac y de nes fé arjonje chi obietifs che nos duc canc on a cuer y plu avisa: la souravivenza y l davegní de nosta rejoneda .

La fondamenta dl’esistenza de n popul de mendranza é zenza dubes sie lingaz che é ence l spiedl de sia identité; apede végnel samben la cultura, la storia, les tradizions y duc chi autri elemenc y aspec che carateriseia na comunanza particolara. Aboncont é l lingaz, a mie vedei, l aspet fondamental da oláche an mess pié via per mete a jì na politica moderna y atuala a na moda che na comunanza de mendranza posse se dé na prospetiva per l davegnì, zenza per chest messei se scluje, ma plutost per podei ester miour enjigneda per se daurí al confront y a les relazionsc con l mond entournvia.

La politica mess mete dassen averda al lingaz y a sie svilup; ala mess entervegní con determinazion te chest setour per ti garantí a la rejoneda de mendranza les condizions ala posse cresce y avei n davegní. An mess crié les condizions y les fondamentes acioche la rejoneda ladina posse se adaté y se relazioné con duc i aspec y i setours dla vita moderna a scomencé da l’aministrazion, da l’informatica enfin ai mass-media.

Chest ultim ram tol ite encuei na valenza dret, dret emportanta ajache l mond modern viv de informazion: de televijion, de radio, de sfueis, de computers y d’auter plu. Al é l pan da vigni dì per vignun de nos. Belavisa a chest setour án volù ti dediché chesta “scontreda di jornalisc’ ladins” olache do mia minonga pòn laoré y dí truep sot al profil dl’informazion desche tamben sot al aspet linguistich. L’informazion é n meso dret emportant per fé cresce l lingaz, ajache chilò méssen reporté duc i dis aspec desvalifs y nuefs. La rejoneda mess se confronté con paroles  nueves, ala mess traté argomenc desvalifs y tl medem temp méssela seghité a se atualisé, zenza rísiela de resté endaour y de ne sporje nia la dreta informazion. Apede l lingaz adoré per trasmete les informazions ruva l’informazion enscí a influenzé indiretamenter la sozieté y chilò á i mass-media na  funzion emportanta ence per cie che reverda l’atuazion de na politica linguistica outa, desche bele dit, devers l stravardament dl lingaz, ma ence y soraldut finaliseda a sie svilup y a sia promozion a livel sozial.

Dut chest se ghira na certa competenza y responsabelté da pert de chi che se dá ju te chest setour. L jornalist de na mendranza mess se confronté duc i dis con sia rejoneda, al mess mete en discuscion en seghit (demeztroi) l vocabolar bele dant man con aspec moderns che vegn do ca; en plu méssel ester enstes tres informé y al mess savei da manejé aspec tecnics desche per ejempl i titui da scrive sun na plata, carateristiches dl rejoné da adoré tl radio o tla televijion y co adoré esprescions linguistiches “pizientes” per interessé i letours.
L setour di mass media y di jornalisc’  á na funzion particolara y de gran valuta  tl cheder general de na politica linguistica che vuel valorisé l lingaz y tl medem temp l svilupé y l renforzé. Samben ne vegn la politica linguistica nia demé fata dai jornalisc’; vigni setour sozial y zivil mess avei sia luegia y sia funzion, a scomencé da la scola y da les istituzions desvalives che é l spiedl dla comunanza.

Sot chisc aspec veidi ie la realté rumancia bele cotant plu inant y truep miour organiseda: al cleca pensé che ai á na plata che vegn fora duc i dis “La Quotidiana”, ai à l radio y la televijion rumancia, strumenc moderns che ti permet de mete a jì duc i dis na programazion demé per rumanc, ai à na “Agenzia de stampa rumancia” per l’informazion y laprò ence d’autres organisazions, desche per ejempl la “Lia Rumantscha” che laoura y che se dà jù con lingaz a livel comunitar. Te chest cheder general él ciamò da enjonté l gran vare inant che i rumanc à dé tl ciamp linguistich oláche l “Rumanc Grijun” (RG) é deventé na sort de rejoneda de referiment. Chest pont de referiment ti permet, a mie vedei, de cresce ence ai idioms de valeda; chisc ne à nia debujegn de messei jì a  tó ca paroles dal talian o dal todesch, che ne é nia auter che l troi envers l’assimilazion, ma ai á a la leta n “lingaz tet” che, enceben che al ne vegn nia rejoné, ti permet de avei n pont de referiment unitar.

Sot duc chisc aspec messonse nos ladins dutaorela cresce. I on la televijion ladina che à na redazion limiteda, trasmiscions televijives y radio che essa debujegn de vegnì smaioredes tla programazion; i on nosta plata “La Usc di Ladins” che vegn fora vigni edema con na bona informazion y n livel cualitatif aut, ma che va inant a “sodlot”, dantaldut per gauja di finanziamenc. I on na bona programazion tres “Radio Gherdeina” y te Fascia ésen do a mete a jì n projet nuef de trasmiscions per ladin en colaborazion con “Radio Record” y con l “Servisc per les mendranzes” dla Provinzia de Trent.

Te dut chest cheder, a desferenza di rumanc, nes máncel endere n pont de referiment linguistich, na sort de “Dachsprache” oláche an posse elaboré l lingaz, fé enrescides, studié do y permete a duc i ladins de podei jí a pié souraldut les paroles nueves per les traduzions, zenza jí a d’emprest dal talian o dal todesch. A mie vedei nes máncel na sort de “ciamena de interrelazion linguistica” oláche chi che laora vigni dí ti ciamps desvalifs con l lingaz ladin, posse avei na ocajion per se “interfacé” y se confronté anter ei y apede vegní metus en consavei dles soluzions linguistiches che zachei à fosc bele laoré fora y à bele adoré.

Da me enfora mess i ladins laoré deplù sun sie lingaz y i jornalisc’ pò daidé truep de chest vers. Belavisa a chest propojit volessi fé n apel a dutes les istituzions dla Ladinia de daidé nosta realté y nosta rejoneda. I pense per ejempl a la “Union Generela” che met en ester n gran sforz per tegnì su la plata ladina y i creie con convinzion che chest laour messessa vegní aprijié deplù; al và reconesciù, seguré y sostegnù dantfora vigni ann da pert de dutes les istituzions. Laprò ála metù en pé , tres la Generela, n sie ofize linguistich, belavisa aldò dl ejempl dla “Lia Rumantscha”, per daidé si dependenc, ma ence con l fin de mete a desposizion de duta la jent ladina na sort de strument d’aiut, n pont de referiment cualifiché che sporj servisc linguistics con competenza, con na basa linguistica interladina de logica scientifica y dantaldut per daidé a fé cresce y modernisé l ladin con n cert coordinament y na certa coerenza anter dutes les valedes.

 

  Plata dl “Rumanc Grijun”

 

 

Cheder di abonés dl organ de informazion ladin plu imortant, la USC di LADINS:

Abonés dal 2000 al 2005
Ann	Gherdeina	Val Badia	Fascia	Fodom	Ampez
2000	905	1.312	525	140	111
2004	907	1.452	462	130	79
2005	906	1.475	490	138	89

Dac sourantouc dal sit dla Union di Ladins de Gherdeina.

 

 Liams a media ladins tla rei:

 

 

 

 

 

 

 

 

Radio Gherdeina

 

           

1 iadesc liet