Mudazion dl statut: na meisa torona empruma anter i ladins Supereda é la vedla strategia dla SVP de traté les chestions de fondamenta con l “Verbindungsausschuß” y cherdan a la jonta i ombolc, sce la cossa é zitia y al é da renunzié
N comentar de Carlo Willeit
Na meisa torona per la reforma dl statut de autonomia él vegnù a enaodé l president Prodi a Bulsan; pro chesta meisa él enfin a sen si aliés, la SVP y i partis talians de man ciancia. Y i ladins? Chi ne sarà endò n iade nia laprò, condut che al é i soui che à veramenter debujegn de na mudazion dl statut de autonomia. La ocajion fossa bona per mete adum les forzes di ladins, ma denant méssen desferenzié i enteresc dla popolazion ladina dai plajeis di partis che comana.
Utilisadours regisgtrés pò ence se lascé lieje dant chest articul.
L proporz, la scola, l lingaz, i media, l TAR, la raprejentanza politica ladina, é ponc clef per l davegní di ladins y é da ejaminé y da mudé dl dret vers. Sun vignun de chisc ciamps à i ladins trat enfin a encuei a la curta per gauja de na regola statutara decontra o nia sun sia mesura. A nia de nia ne ti jova ai ladins na meisa torona de revijion dl statut sce ei ne é nia laprò con sie cef. La miour streda per arjonje valch plu de valuta per l davegnì di ladins fossa dessegur chela de abiné encer na meisa sia les forzes politiches ladines, autonomes y di partis tradizionai, adum con raprejentanc dles istituzions plu enteressedes y con la Generela (UGLD) desche union sozio-culturala tet. Supereda y faleda é la vedla strategia dla SVP de traté les chestions de fondamenta per i ladins demé con l’arat de sie comité de coordinament y cherdan a raport i ombolc ladins sce la cossa é zitia y sce al va debujegn da ti fé renunzié ai ladins enstesc a les dretes rejons. Se cruzié concretamenter de na meisa torona ladina desche preparazion a la meisa enaodeda da Prodi ti stessa poester miour soura al assessour regional a les mendranzes.
(0)Al ne me plej nia
(0)1 iadesc liet