En chesta domenia: referendum sun la lege linguistica
AI 17 DE JUGN DEZID I LITADOURS GRIJONS SUN LA LEGE LINGUISTICA
Tles ultimes edemes à partis y organisazions tout posizion, per o contra la pruma lege linguistica dl Cianton Grijon, metuda a votazion referendara en domenia, ai 17 de jugn 2007. Al ne à nia mancé che valch partì ae straout sia posizion de 180 degrés y ti à retrat sie sostegn a la lege do che ai la ova deda pro tl Consei Gran, olàche la lege é passeda en l ann passé de otober dl 2006 zenza contraoujes 106:0. I osservadours é a una: la votazion jirà fora a les strentes. La lege dess ti garantì ai rumanc y ai talians na miour sconanza te sie teritore tradizional. Prum anter i oponidours é l avocat Peter Schnyder che à metù a jì l iter referendar y che é l portaousc dla iniziativa contra la lege.
Chest ghira la lege ciantonala sun i lingac – Contra chesta lege à endere n avocat da Schiers/Aschera trat su firmes per mete a jí in referendum, ajache al la rata contra la “liberté de lingaz”
Die Förderung der Minderheitensprache ist in der Weltwoche wörtlich als “Unsinn” bezeichnet worden
Entratant se à sclut permez al clap de oponidours ence l partì popular svizer (SVP) che ti ova dé tl Consei sie plen sostegn. Ence valch autra organisazion se à fat audí contra, p.j. l orden di avocac, ma degugn ne à tout posizion davertamenter contra. Aje ti peta su a Schnyder dantaldut la regolamentazion dla percentuala 40% – 60%, vuel dì n comun con 40% de declarés rumanc vegn raté rumanc y lingaz ofizial é demé rumanc, p.ej. te consei de comun. Con na percentuala de almanco 20% rumanc tl teritore tradizional vegn n comun raté “bilingh” y lingaz ofiziai é sibe todesch che rumanc. Chest vuel dì che i comuns ne pò nia plu dezide da soui te chestions de lingaz desche al fova usanza enfin a encuei tl Grijon, olàche i comuns é tradizionalmenter bendebot autonoms. La gauja che à fat pié via chesta iniziativa legislativa é steda la ultima cumpeida dla jent dl 2001 che à condut a lum n descresce festidious dla componenta rumancia.
(0)Al ne me plej nia
(0)