La bona novela de encuei: l prum quorum é vegnù arjont
L quorum é vegnù arjont ensnuet da les 19.00: la maioranza di litadours ta Fodom, l 57% y l 51% a n’Ampez à lité – a Col l 44% – L quorum dopl é de: 3.415
La pruma gran tricola: arjonje l lim dl quorum, vuel dì la maioranza di litadours, à podù vegnì desfanteda via ensnuet. Enfin a mesdì fova jus a lité 1.370 litadours a n’Ampez sun 5.191 litadours, 100 a Col sun 403 litadours y 263 ta Fodom sun 1.234 litadours. Na bona afluenza ence domesdì. L resultat intermediar da les 17.00 fova de entourn l 40%, vuel dì entourn 2.750 litadours à lité. Aladò dles ultimes nueves ova lité da les 19.00 l 57% di litadours da Fodom (711 litadours), l 44% a Col (178 litadours) y l 51% a Cortina (2.644 litadours), endut 3.533 litadours, l 51,54%. L quorum de 3.415 zetoles dedes ju é enscì arjont y bonamenter superé te chestes ultimes ores. Arsalf zetoles nia-valoules che mess vegnì trates ju, é l referendum da souramont enscì valoul. Al ne vegn nia raté comun per comun, ma duc trei i comuns deberieda. Les sentes litales scluj da les 22.00 y deura endoman da les 07.00 y resta davertes enfin a les 15.00. La seconda tricola: vegniràl pa ence arjont na maioranza per l “scì”, l secont quorum de 3.415 oujes per n eventual destach di trei comuns dal Venet anter la popolazion?Duc i foliec, dantaldut chi da Belun, à dit dantfora che la jent jirà a lité en gran numer. Chesta fova ence la previjion de persones intervistedes te chisc ultims dis. Arjont l quorum, messaràn aspeté enfin a en lunesc seira per savei l resultat de repartizion dles oujes per l “scì” o per l “no”. Te chest caje é les previjions che l “scì” la davagne, ajache al ne se à formé no a Cortina, no a Col y tant demanco ta Fodom grups che essa fat propaganda per l no. Te chisc ultims meisc él sté bendebot de informazion sun l argoment che à arjont vigni ciasa.
La domanda referendara é:
Ladin:
“Voleise che l teritore di comuns de Anpezo, Fodom y Col vegne destaché da la region Venet per passé desche pert integranta a la region Trentino Alto Adige/Südtirol?”
Italiano:
“Volete che il territorio dei Comuni di Cortina d’Ampezzo, Livinallongo del Col di Lana e Colle Santa Lucia sia separato dalla Regione Veneto per entrare a far parte integrante della Regione Trentino Alto Adige?”
Al me plej
(0)Al ne me plej nia
(0)
(0)Al ne me plej nia(0)2 iadesc liet