Soura les Dolomites ladines él vegnù saren
Meton man de ester manco crauttaitsch y ester plu ladins: l burt comportament dl assessour Florian Mussner y di trei ombolc de Gherdeina
Sen bàstel con les paroles, con les tricoles y con i pregiudizes. I on sen dant man l resultat storich, na realté clera che n’à debujegn de degun comentar. Souramont é plu ladin de nos, dessegur altamo te sia coscienza politica, te sia vueia de creie tla mendranza ladina desche grup etnich, te sia volonté de unité, de sté adum y colaboré deberieda. Ei ne à mai rejoné de confins, ei ne i à mai azeté, al fova i ladins de Bulsan a tegnì cont di confins y a mete averda ch’al ne sciampassa mine valch scioldi soura i confins via. Nost assessour Florian Mussner à rejoné y rejona dutaorela de confins che ne dess assolutamenter nia vegnì spostés. Florian Mussner y si trei fanc, i ombolc de Gherdeina, minova de podei dé conseis a chi da Souramont aratan l referendum per nia, ajache les dificoltés de arjonje l travert de ruvé pro Bulsan é massa granes. Sce an paridleia Mussner y i ombolc de Gherdeia con l comportament di ombolc dla Val Badia, che à dé personalmenter n aiut al comité da Souramont per informé la jent, spo veiden cler che ai ne à volù fé nia de nia, ajache ei ne vuel nia chi da Souramont pro Bulsan. Ciun pa l motif? Tema de sia concorenza? Tema de ester da manco? A chest pont él cler che Mussner mess lascé de mete i bastons anter les rodes a chi da Souramont y stimé a Durnwalder che ti à fat la grazia d’ester assessour. Na contradizion sauta ai uedli: co él pa poscibel che i ombolc dla Val Badia, persones tant davertes politicamenter dalvers de chi da Souramont, azeteie spo desche raprejentant politich na persona, Mussner, tant scluta de vigni vers a l’unité ladina? Gauja l barat Bioch Gasser con Mussner ései propi a una de avei per autri cinch agn Mussner desche raprejentant, canche ai arata ch’an mess daidé chi da Souramont a vegnì pro Bulsan y no ti crié milesc de dificoltés! Con Mussner raprejentant chi da Souramont ne ruva nia pro Bulsan. Complimenc a les trei Caterines Lanz, al comité pro referendum da Souramont, al comité mareo-badiot “Amisc dla Ladinia unida”. La speranza y la forza ves à premié. Complimenc a chisc doi comités che à volù y sapù cherdé a colaboré persones inteletuales sciurades sun na pert y a damané l contribut a duc. Dilan. L gran laour met empormò man, ma deguna dificolté podarà ves sperde. Inant adum, la forza vegn dal grum. La outa storica à metù man, ala à ciafé sie batum. Provon de ester manco crautdeutsch y plu ladins. Soura les Dolomites ladines él vegnù saren. (uc)
Al me plej
(0)Al ne me plej nia
(0)
(0)Al ne me plej nia(0)2 iadesc liet