Durnwalder: nos se sention dret amisc di ladins tl Beluneis
LA STAMPA BELUNEISA É TI ULTIMS DIS PLENA DE ARTICUI – LES MOTIVAZIONS STORICHES DI TREI COMUNS NE GIATA ENDERE NIA SIA DRETA LERCH – AL VEGN DEMÉ REJONÉ DE PRIVILEGS
Luis Durnwalder.
Chisc dis él vegnù fora sun la stampa beluneisa na lignola de articui olàche l president dl Venet, Galan (Forza Italia), cuej dal senn per gauja dl referendum de Ampez, Col y Fodom. Al acuseia endò l president dla jonta dla provinzia de Bulsan Durnwalder de daidé “promueve l referendum”. Durnwalder se defen, ma al à bele dit che sie arat tl consei provinzial de Bulsan tl caje de n referendum positif, sarà tamben positif. Samben, les rejons y les gaujes storiches di trei comuns ladins vegn corides via dai scrais de Galan contra i “privilegs” dles regions autonomes.
Per cie che reverda l referendum dij Durnwalder: «L colegh Galan sa avisa che no la provinzia de Bulsan ne l á volù y nience la Svp. La ghiranza de referendum é pieda via dai comuns enteressés, da zitadins de sia region. Da nosta pert – enjonta Durnwalder – ne onse mai damané n ampliament de nost teritore, ma i on dit cler che i sention sentimenc de amizizia sota devers i ladins tla provinzia de Belun. Degugn ne à mai cialé de influenzé les dezijions de chestes comunités che tolarà sia dezijion en plena autonomia. Galan fajessa miec de enrescì les gaujes che à condut la jent a se damané l referendum empede scraié”. Galan: “Él o ne él nia veir che si parlamentars a Roma ti fej adentene al govern de Prodi a Roma l spaventadl de cheles doestrei oujes che al vuel ester per fé governé Prodi? Él o ne él nia veir che chi che somieia de trapiné tla provinzia de Bulsan ne l fej nia tant per podei rejoné ladin, ma demé ajache tla provinzia de Bulsan pluevel deplù euro da la Talia che dutes les steiles che toma tla nuet de San Laurenz? Él o ne él nia veir che da Bulsan él vegnù mané material de reclam a Ampez per sostegnì la sezescion dal Venet?”
Samben, empede ti sauté ados a Durnwalder, fajessa Galan miec da splighé cie che les doseines de deputés y de senatours dl Venet fej a Roma.
I tons deventarà plu de fuech, plu damprò che an ruvarà al referendum. En l’ultima edema ova Galan ciamò manacé de recore a la Court Europeica. L problem general dla chestion y negatif é che Galan y l Venet ouj plu y plu la atenzion sun i “privilegs” dla autonomia dles provinzies de Bulsan y de Trent y che les motivazions storiches di trei comuns de Ampez, de Fodom y de Col per ruvé tla provinzia de Bulsan/region Trentin-Sudtirol ruva plu y plu sot a les rodes ite.
(0)Al ne me plej nia
(0)2 iadesc liet