Dreaming of Fanes (Somian de Fanes), la CD nueva de Susy Rottonara, à podù fé pera tla categoria „Best album of the year“ pro i 53. Grammy Awards. Na ocajion emportanta per prejenté n produt musical daldut lié al lingaz y a la cultura ladins a n gran publich internazional.
La CD contegn les mujighes dl Poem Musical Fanes scrites y ciantedes da Susy Rottonara sun i tesc per ladin de Roland Verra y la mujiga dl film „Le Regn de Fanes“ che à bele trat deplù pesc internazionai. Les mujighes dl Poem Musical Fanes é gnudes elaboredes te n aranjament nuef, olàche l’autoura cianta enstessa ence les pertes scrites per l cor, tl moment che ala somieia da conté la lijenda y da audì laprò. L cianté zenza paroles raprejenteia la ousc dles figures souranaturales dla lijenda, che te deplù toc é da audì sciche ne melodia soura l test cianté. Tl acompagnament él l sonn original de na vidola, n fabló trasversal y na posauna adum a deplù efec strumentai eletronics realisés con l keyboard. La mujiga raprejenteia l some dla lijenda de Fanes, che à metù man canche Susy Rottonara somiova bele da picera ensù da interpreté la protagonista dla contia, te n stil particolar che chier l liam con la natura dla mont, olàche l sonn y l ritm é ledesc da les convenzions tradizionales y ciafa tla dimenjion dl some sia realté. L contegnù dl Poem Fanes vegn porté dant con melodies arcaiches tl’archirida de na sperimentazion musicala, olàche l passé y l prejent, l some y la realté é liés adum con les atmosferes magiches dla lijenda.
L CD é da ciafé online sun les plates web di maiours destributours musicai y tla Athesia da Bulsan. Aladò dla relevanza internazionala dla prejentazion ai Grammys gnirà „L Poem Musical Fanes“ porté dant te n alestiment con la Orchestra Filarmonica taliana te deplù spetacui a pié via da aost y ruvarà de setember tl Teater Comunal de Bulsan.
(0)Al ne me plej nia
(0)716 iadesc liet
Scrive n comentar a revert de "Susy Rottonara: „Somian de Fanes“"