Fata la lege, ciapé l engian L burt vive adum ai neo-Ladins da Belun
de Lorenzo Soratroi
Dinés, dinés, dinés. Vigni ocajion é bona per i neo-ladins tla provinzia de Belun de se sciaudé decontra ai ladins di trei comuns per via di finanziamenc regionai a les mendranzes. N burt vive adum y per chi autri l’ocajion de vegnì sun chest mond de gré ai finanziamenc regionai. Ai fej tres de dut per ti i tó ai Ladins di trei comuns.
Sul retrat: la vila da Pescosta/Ornela ta Fodom.
L’ultima polemica vegnuda fora do che Raffaele Irsara, dl’Union da Fodom, à volù prezisé che l’Union dl Cadore de Medo ne fej nia pert dla Federazion, coche al fova depierpul scrit sun n sfuei, fej entene dalvers ciuna che é la soula vueia che ai. Ence a cost de contradizions. Al é vegnù dit y scrit defat che degugn ne vuel jì tla Federazion zenza respeté la democrazia dl statut; ma tl medem temp díjen ence che al é vegnù giaté na streda per depassé dlongia via l ostacul: a la taliana, fata la lege, ciapé l engian, plu che a la ladina.
Al é plu che mai cler che la ora à soné da n pez de deleghé la Federazion, per coche ala é metuda adum y de fé adenfora does federazions che tole ite chi che vuel dalbon sté adum. An ne podarà nia l clamé “divorz”, percie che empruma éssen messù ester maridés y i agn dla federazion ne é stés per i ladins di trei comuns auter che n burt vive adum y per chi autri l’ocajion de vegnì sun chest mond de gré ai finanziamenc regionai.
Mai che an essa sentù che chisc ultims sie jus a Venezia a se enteressé percie che la Region mete plu dinés a desposizion, mai che ai sie jus a vedei percie che la medema Region se lasce tant dlaorela per paié fora cheles cater sbrosces che oramai vignun giata. No, mai! Plutost decontin fé dles dutes per ti tó valch ai Ladins di trei comuns. Ciamò n iade é chisc ultims che mess scraié, coche al à fat da puech l president dl’Union da Fodom Nani Pellegrini, per ti fé prescia a la Region de respeté i termins.
Te chest contest féjel plajei audì che pro l convegn de Bulsan, entitulé “ I Ladins, na mendranza te na mendranza” síel vegnù solecité de daidé fora i Ladins de Fodom, Col y de Ampez.
La lege cheder sun les mendranzes rejona cler: “olàche les mendranzes é despartides anter plu provinzies o regions, pòles se mete su organisms de coliament reconescius”. N tel organism él bele (la Generela ), la provinzia de Bulsan à fat na delibera “ad hoc” per sostegnì l coliament anter i ladins decà y delà dai joufs. Ma per podei vegnì daidés, mess i ladins di trei comuns arjonje l’independenza da duc chi autri.
(0)Al ne me plej nia
(0)2 iadesc liet