Provinzia da Balsan y Ampëz

Ampëz se aoda na colauraziun cun la Provinzia da Balsan y inzescü

Na colauraziun por ti dè na soluziun ai problems che reverda trames les provinzies, la cultura y i ladins ampezans: chisc é stês i tems metüs sön mësa intratan l´incuntada tignida inier (04.12.2002) inanter le presidënt dla Junta provinziala de Balsan Luis Durnwalder y l’ombolt nü de Cortina d´Ampëz, lité chëst ann, Giacomo Giacobbi.

Tla discusciun él imprömadedöt gnü atochè le gran problem dl trafich de transit: al é gnü valuté le stüde che la Provinzia de Balsan à lascé fà por mioré le transiamënt söla strada statala de Puster y les esigënzes dles döes perts por ci che reverda le stradun danter Toblach y Cortina. Al é ince gnü rajoné dl mioramënt y amodernamënt dla ferata de Puster che le Govern a Roma pê che sostëgnes. En ater tema é ince stades les infrastrotöres che an podess anuzé deplü deboriada: p.ej. l’implant da bob a Cortina che podess gnì adoré te na maiú mosöra da sportifs de Südtirol y l’ospedal de Sanciana te chël che bele sëgn ampezans se lascia condüje.

“L’ampliamënt dla colauraziun cun Cortina” – á dit inier le presidënt Durnwalder – “tol ite tambëgn ite manifestaziuns de carater cultural, sciöche l´ Edema mahleriana y ince le receimënt dles trasmisciuns ladines dla RAI, a chëres che ince la jënt de Cortina é dër interessada.”

An s’á tut dant de afrontè chisc punc plü tl detai te na proscima indunada.

Fontana: OSP – e.b.

Al me plej

(0)Al ne me plej nia

(0)

4 iadesc liet

Ortiede inant tres