Projet Sottsass – restaur dla ciasa de comun d eCianacei

Splendour nuef a la ciasa de comun de Cianacei

Trueps laours é vegnus fac dai studenc dla scola d’ert de Poza sot a la souraverda de si professours y de tecnics

Abineda de gran enteres chela de enseira (12 de dezember) a Cianacei tla sala dles adunanzes de comun. L’ocajion fova la prejentazion dl liber dal titul “Progetto Sottsass” che porta dant les
esperienzes de restaur dles tafladures y dl mobiliar de legn tla ciasa de comun de Cianacei. Desche trueps sà, à la ciasa comunala na storia longia y cis che ala é vegnuda dessegneda dal famous architet y designer Ettore Sottass, descendent da la Val Badia, nasciù dl 1892 y mort a Torin dl 1953. Na figura dutaorela bendebot emportanta tl mond dla architetura taliana da do la pruma vera. Ettore Sottsass senior à
dessegné sibe la ciasa che l mobiliar, lascian n rich antare che é vegnù derturé de gre en gre ti agn passés canche an à metù man da laoré pro l projet nuef dla ciasa de comun de Cianacei.

Al se trata de n restaur emportant a chel che al à tout pert ativamenter i studenc dla scola d’ert de Poza “Giuseppe Soraperra” con l fin de ti dé endò splendour al rich patrimone de dessegns, de sciadrees, de meises, duc nodés con la firma dl gran maester Sottass. Per i studenc él sté na poscibelté de emparé a conesce sun l post chest rich patrimone sot a la direzion dl prof. Massimo Chiocchetti de Moena dla souraintendenza y de varenté na ciasa che an volova enlaouta enfinamai tré ju, ma ala fin àn tout la dezijion de fé n projet de restaur complessif sibe dla ciasa che dl mobiliar. Per recordé chest laour de restaur él vegnù enscì prejenté l codejel “Progetto Sottsas”, dé fora deberieda da la scola d’ert y dal comun de Cianacei.
A la prejentazion enseira à rejoné l assessour a la cultura Mariano Cloch, l dr. Fortunato Bernard che fova ai temps dl restaur sourastant dla scola d’ert de Fascia, l dr. Maximilian Leuthenmayr, coordinadour dl restaur, Massimo Chiocchetti, Morandini y Claudio Valentini dla scola d’ert. Da dutes les pertes él ruvé adalerch paroles de aprijament di laours de restaur. A la fin à ence rejoné Giovanni Dellantonio de Moena, funzionar dl ofize ai bens architetonics dla provinzia de Trent. Per i studenc dla scola él sté na gran esperienza de laour.
Domenico Volcan

Al me plej(0)Al ne me plej nia(0)

1 iadesc liet

Ortiede inant tres