Presentaziun: sabeda, 14.12.2002, dales 16.00 a Lungiarü

“La Roda dl Tëmp” – Morins da paur tla val da Lungiarü, liber  metü adöm da Giovanni Mischì y Mario Clara.

de Mateo Taibon

I morins, en iade ram essenzial dl’economia, incö en toch dl passé che é por tröc folclor. Val’ de bel da i ciaré. Y valch che ne joa plü a nia: Giovanni Mischì desco autur di tesc’ y Mario Clara sciöche fotograf à orü documenté le patrimone de en tëmp oramai passé. Storia, tecnica, vocabular, dessëgns de ilustraziun, fotografies – belëza y completëza é les döes cualitês dl liber de Giovanni Mischì y Mario Clara sön i morins da Lungiarü.

Söl retrat: un di auturs dl liber, Giovanni Mischì, da Seres/Lungiarü

Le liber trilingual é partì sö te capitui tematics: Viles y morins – chilò vëgnel traté la storia y sües testimonianzes, desco de vedli documënc y dessëgns; al é la pert cun le plü test. Arbandonn – chësc capitul é fotografies che documentëia le degradamënt di morins. Ala chirida de fostüs – ince en capitul de beles fotografies che documentëia i morins y toc de morin, cun de bi retrac de paurs. La roda dl tëmp – na documentaziun fotografica, cun valch picia spligaziun scëmpla, tlera, cörta, deache la gran pert dles fotografies n’adora degün comentar, dl comié da en ram economich essenzial y da en vedl förtl che i tëmps moderns à sostituì deplëgn. Mischì é tlo sparagnënt cun les parores, a baié él les fotografies. Les fotografies de Mario Clara è fates cun gran sëns dla fotografia, dla profondité dles imajes, dla composiziun geometrica, dl’espresciun dles porsones.

Injunté él ince na vijiun di implanc a ega, na lista monüda y con cherta topografica di morins, fojines, siëies, cialciares, implanc de traziun a corda. Y ala fin él ciamò na lignora de rafiguraziuns dessegnades dles perts dl morin cun laprò en glossar. Indöt zirca 190 plates bun ecuilibrades; en liber informatif, plajor, bun fat tl layout (Gruppe Gut).

Le liber gnarà presenté tl cheder dla Reuniun Generala dla Uniun Ladins Val Badia in sabeda, ai 14 de dezëmber, dales 14.00 tl salf dles Uniuns a Lungiarü.

Giovanni Mischì, Mario Clara: La roda dl temp. Morins da paur tla val da Lungiarü. Uniun Ladins Val Badia 2002

Al me plej(0)Al ne me plej nia(0)

2 iadesc liet