La politica de Mussner: laoré contra na majera union anter i ladins
Sia politica dal 2003: canta sce al ne fajessa nia, ma al laora dassen contra – Sie obietif: joufs con stanges – Di Cultural: encensc y fum
Cialé ciàlel ca da persona valenta y daverta, díjei, ma la paruda engiana. Duta la politica dl assessour SVP Florian Mussner dal 2003 enfin a encuei desmostra che al laoura con gran determinazion contra na majera union anter i ladins dles Dolomites. Con fac: l ann passé él sauté da piz a cianton per mete a paiament les stredes soura i joufs devers Ampez, Fodom y Fascia, ma ence l jouf de Frera anter Badia y Gherdeina. Al ova na prescia mata con cheles stanges. Na tel mesura zaressa les valedes entourn l Sela nia demé sozialmenter ma ence economicamenter ciamò plu endalauter. Chest ne é endere mai sté n argoment per chirì alternatives. Ajache chest é l obietif nia declaré y danz nia rejons de sconanza dla natura che Mussner sburla dantcá. Ciamò ne ti éla nia garateda.
Mussner: degun vare zenza Durnwalder.
Da la Ciasa alberch per laoranc y studenc a Bulsan, fata su ciamò sot a la iniziativa y a la sburla de Carlo Willeit, àl scut fora categoricamenter fascians, fodoms y ampezans con la vertola che ai vegn da defora dla provinzia. Na vertola: a Dispruch él milesc de studenc sudtiroleisc che é parifichés a chi da lafora. Olà che al é la volonté él ence n troi dìjen, ma al ti fala la volonté y la sensibelté per la Ladinia.
Dl 2003, canche al fova ciamò assessour cherdé da Durnwalder, àl metù adum chel decret contra la ofizialisazion y la elaborazion de n lingaz scrit dolomitan ti tolan ence al Istitut Micurà de Rü na rejon de ester y de svilup de sies ativités. La minonga di esperc ne à enfin a sen nia rosedé sia impostazion. Al se met de soura.
Ti ultims agn àl enstes trat su na sort de “di cultural ladin”, samben dut a laut dl partì, zenza brancé ite valch de concret. Encensc y fum che veid al plu la partezipazion di empliés provinziai. Empò dijova Mussner chisc dis tla televijion: “l di cultural vegn metù a jí a Bulsan a desmostrazion che i ladins se deura al mond foravia”, ma tl medem temp ne pisímel nia da scluje fora mesa la Ladinia. (ji)
Al me plej
(0)Al ne me plej nia
(0) 34 iadesc liet
