Podei, mo nia messei

L parlamentar ladin, Daniel AlfreiderL parlamentar ladin, Daniel Alfreider
Sciche i on podù lieje à la Ciamena di Deputac a Roma aprové ai 11 de jené 2017 en pruma letura na lege che podessa ti garantì n valgugn derc emplù ai ladins dla provinzia de Bulsan y valch puech ai fascians. Al é da vedei sce l Parlament stará empé fin che chesta lege sará vegnuda aproveda na segonda outa da la Ciamena y spo does outes dal Senat.
Ladins te Consei, Ladins te Comiscions
Chesta lege dij,sce ala essa da ruvé a termen,che i ladins podessa fé pert dles Comiscions di 6 y di 12, che l assessour ladin podessa ence vegnì un di vizepresidenc dl Govern provinzial; n ladin podessa ence vegnì sourastant dl Consei provinzial,mo  chest demé sce i todesc y i talians fossa a una. Chesta sotmiscion a les vueies o lunes di autri doi grups me sà na gran umiliazion che i ladins ne pò nia azeté; i autri ne damana  nience mai i ladins sce ai pò tò ite chest o chel post tl Consei. La norma de podei – ma nia messei – tò ite te Consei n ladin nia lité vuel dì podei ignoré la volonté di litadours ladins,cie che é contra vigni prinzip de democrazia raprejentativa. Con chesta lege ne giatassa i ladins dessegur nia i medems derc di autri grups linguistics, sciche al  é vegnù dit, da chest travert restàssei ciamó dret dalonc!
Tles Comisciuns di 6 y di 12 essa i ladins da giut bele podù vegnì metus sce al fossa sté la volonté de chi dl gran partit che é sté feter mesa na vita te chestes Comiscions. Ladins tocàssel ence te dutes les autres istituziuns publiches de relevanza provinziala. Sce an rejona spo de n assessour ladin y de n ladin che podessa vegnì president dl Consei provinzial, voléssel ester doi ladins te Consei; perchel audìssa na lege da garantì la raprejentanza de doi ladins te Consei provinzial, zenza fossa l segont post cherié per nia. Te Consei y te Jonta podéssel demé ester chi doi ladins che i ladins à metù da les lites provinziales aldò dla lege!
Souramont, na plaia daverta!
Na gran mancianza tla lege ladina é chela che ala ciala demé di ladins dla provinzia de Bulsan y lascia fora i autri. Al audissa che duc i ladins podessa avei i medems derc, che duc i ladins fajessa pert dla medema region. Ie rate che al fossa gran debujegn de enjonté tla lege la ghiranza che Souramont posse ruvé pro Südtirol, tegnan cont de dutes les deliberes di comuns de Souramont dal 1946 encà y dles gran desmostrazions sun l Jouf de Sela. Cis cler é sté l referendum dl 2007: con ousc aguda à plu dl 80 %  di litadours ( Ampez 76,53 % – Col de S.Lizia 83,33 % – Fodom 86,42 %) ghiré la trapasseda de Souramont da la provinzia de Belun a chela de Bulsan. I ladins taiés fora y  despartis scraia dadaut che Bulsan dess finalmenter daurì i uedli, mené i zochi y la capì che na popolazion entiera damana giustizia. Sce Bulsan volessa fòssel bon de porté chest problem cotant inant fin a bon fin. Bulsan ne pò nia plu ignoré chest gran tort fascist che ti é vegnù fat ai ladins. Sce una na plaia sangoneia él dut le corp che s´en sent.
 Sciche i conescion bele la politica de Belun, Aunejia y Roma ne fajarái nia per ti garantí a Souramont i medems derc, ma an zercarà de i despartí ciamò deplù ti conzedan valch fregoles de contribuc. Tla provinzia de Belun él 36 comuns che se à declaré ladins, la gran maioranza demé per giaté contribuc da la lege n. 482 dl 1999 per fé folclor per l turism. La soula soluzion per i ladins é de i abiné duc adum tla medema region – provinzia, dut l auter é demé cosses meses fates y de gran ilujions che ti spuda saolon ti uedli a chi de Souramont.
Lois Trebo 
Al me plej(5)Al ne me plej nia(0)

327 iadesc liet

Ortiede inant tres

Scrive n comentar a revert de "Podei, mo nia messei"

Scrive n comentar

La miscion e-mail ne gnirà nia publicheda.


*