L plumac finanziar dl’autonomia de Bulsan é enseira (30 de november) vegnù ciarié ite con valch novités. Pro les tratatives a Milan é l president dla provinzia Luis Durnwalder ruvé anencef con i ministri GiulioTremonti y Roberto Calderoli.
L acord per arjonje n finanziament plu segur tl cheder dl federalism fiscal per Bulsan ne mess nia plu vegnì marciadé vigni ann danuef, veid dantfora che Bulsan pò pié do sciche dant l 90% (nuef diejems) de dutes les coutes scodudes tla provinzia. Da nuef él che la Provinzia ciafa en plu les coutes sun l davagn dles sozietés IRES y la steora sun i juesc de fortuna. Da chestes fontanes pò la provinzia tré ite entourn a 300 milions de euro deplù.
L Stat se tol soura de dé ca l finanziament de uega per les competenzes sourandedes a la provinzia, che é la scola, l manejament dles stredes y i ofizes de motorisazion. Per chisc capitui vàl debujegn de feter 300 milions de euro anualmenter. En plu se oblieia l Stat de ti paié vigni ann 100 milions de euro ala Provinzia per despaié ju i debic amudlés ti agn dal 2000 al 2005.
A les casses dla Provinzia ti tòmel depierpul demez les somes dla Iva sostitutiva de entourn a 337 milions de Euro, la pert dl bilanz che abinova adum scola, stredes y motorisazion, 301 milions de Euro y i dinés aloghés da leges de setour che veid dant programs y fonds speziai per ciamps spezifics. Dut adum ti tòmel demez enscì damprò da 702 milions de euro de entredes a la Provinzia.
Plu inant él vegnù marciadé les competenzes nueves che la Provinzia de Bulsan volessa gen sourantò. Per chestes éla enjigneda a spene enfin a 100 milions de euro. Chisc dinés dess vegnì adorés per sostegnì les persones zenza laour, te cassa integrazion o en mobilté, ma ence per paiamenc a l’université o al conservatore, per l servisc dla posta o l finanziament di programs todesc y ladins dla RAI. Tres chesta acordanza podéssel se daurì na finestra nueva per n ampliament dla programazion ladina tla RAI. La Provinzia de Bulsan se à tamben sourantout la grovaria de daidé realisé programs per i comuns a seida con Belun y Sondrio con entourn 100 milions de euro che jirà endere al stat demé tla mesura che l stat retarà con ti dé ju competenzes a la provinzia de Bulsan.
L president Durnwalder rata che tres les majeres entredes da les coutes, da les competenzes statales sourandedes a la provinzia y tres l despaiament dl debit dl stat envers la provinzia, vegniràl empò arjont n bilanz provinzial ades sciche chest ann de 5 miliards de euro.
L’acordanza de enseira vegnirà integreda tla lege finanziara dl stat. Do che chesta vegnirà deda pro tl parlament, messaràl vegnì adaté les normes de atuazion dl statut de autonomia per sourantò les competenzes nueves.
(0)Al ne me plej nia
(1)1010 iadesc liet
Scrive n comentar a revert de "Plu competenzes a la provinzia"