L Sant Ojöp Freinademetz da Oies, na lum per les coscienzes
Al s’à empié na lum per nos, delibreienes da l’engordia dl turism
de Umbert Cians
La gran festa per l di dla santificazion dl beat Ojöp Freinademetz é ruveda, chi che é jus y à podù jì a Roma é endò a ciasa. Duc a una: al é sté dret bel. Les emozions durarà ciamò inant y ales daidarà recordé y darà souradut la vueia de conté inant tl temp la bela esperienza. Per valgugn dis ne n’àn nia rejoné de implanc portamont, de canons dla neif, ma de sanc y cis de n sant, samben de chel ladin.
An é jus encontra a n sant con l cuer plen de speranza de giaté sia benediscion speziala per na vita nueva tla pesc, tla sanité, tla fede. An é ence jus per patriotism per rete onour a n sant che nes fej onour ajache al é de nosta mendranza. Freinademetz desche sant é universal, catolich, ma al é ence local per nos, sce i savon y i miriton de l tegní anter nos.
Sciche an à ence podù lieje sun “La Usc di ladins”, é Freinademetz endò vegnù derevers a ciasa, ence sce spiritualmenter réstel samben tla Cina, y ruva endlonch olà che al vegn perié. Al sarà tant plu con nos, tant plu che i nes astilon aldò. L sant veid ite te nosta coscienza, ala ne va nia da ti ascone valch y perchel veidel avisa chela che é nosta dreta intenzion. Al conesc nosta debleza y al sà, olà che ala met man la colpa y olà che ala se ruva. Sia conescenza persoura nos é sen n puech sciche chela de Chel Bel Idie, plena de misericordia, ajache al conesc y veid nosta natura: sies capazités, si defec y sie liam con la luna (bona y ria). Oies, à dit Durnwalder, vegnirà abelí, deslargé fora y con na bela streda che ti ruva permez, per garantì n majer confort ai vijitadours de devozion. Chela picera stua da Oies garatarà n zenter spiritual y la gliejia cineisa de Oies ciala contra Piz La Ila per recordé ai schiadours che la dreta pesc vegn da l daidé i autri, i pueresc de vigni degré y no demé dal devertiment. Freinademetz, oramai a ciasa, veid ite che l’economia ladina encueicondì ciala fora autramenter y che l turism é sie motor. Ma an podessa ence vive con n turism manco engorde, con n majer respet dles tradizions, dles regoles de nosta religion. Cie che conta é pa souradut chisc valours. Freinademetz daidarà ence economicamenter, ma al sarà dantdaldut na lum per les coscienzes.
(0)Al ne me plej nia
(0)1 iadesc liet