benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Servisc de trasport
Scola

 

L trasport de 21.400 scolés al di é enjigné

L servisc de trasport per 21.400 scolés per vigni di entant l ann de scola 2003/04 é vegnù dé pro dal govern provinzial

(if) Ence per 600 scolés y mutons handicapés che mess ruvé vigni di a scola, te berstots o zentri de reabilitazion, à la jonta provinziala dé pro l servisc de trasport. Da d'auton podarà 17.300 scolés furné con les corieres y la ferata de linea a scola. 4.100 scolés vegnirà menés a scola con auti privac sciche taxis. Enchin a 380 firmes vegnirà enciariedes per chest servisc che é ciamò vegnù dé pro dant la paussa da d’isté dl govern provinzial. I 600 scolés y mutons handicapés vegnirà menés con auti speziai dla comunité de laour per handicapés, la Pro Juventute y l Servisc dla „Lebenshilfe“ a scola, tles berstots o ti zentri per handicapés. Entratant l viade vegnirà chisc scolés ence acompagnés.


metù ite da noeles ai 07 August 2003 da les 12:00:35 (818 liet)
(liej inant... | 2045 letres | 1 comentars | ponc: )


Pericul de meldefuech
Desvalives

 

Pericul de meldefuech ti bosc

Ence i raions che é plu alaut é sen tochés dal pericul de meldefuech

(if) Fé fuech alalergia é dassen pericolous, dij i responsabli dl servisc forestal. La regola che an ne pò nia fé fuech enchin a 20 metri dal bosch vegn sen ciamò slargeda fora. Per via dl gran pericul de meldefuech él sen ence proibì fumé, fé fuech te na luegia, ence sce mureda, o adoré n gril a gas tl bosch o davejin al bosch. Con l truep bel temp y les temperatures dastramp autes resta ence l pericul de meldefuech ti bosc gran. La forestala ti racomana perchel a duc de mete dassen averda con l fuech alalergia. La situazion podarà empermò mioré do plu dis da de gran pluevies.

metù ite da noeles ai 07 August 2003 da les 08:03:53 (788 liet)
(liej inant... | 1269 letres | 1 comentars | ponc: )


Al Plan de Mareo: Preselezion de MISS ITALIA
Manifestazions

 

Les plu beles eles sun plaza de gliejia

Na giuria con l ombolt de Mareo laprò à lité per  Elisa Martini, 23 agn de Thiene (VI) che é sen la nueva “Miss Cinema Trentin Südtirol”

(if) La finala dl concurs plu famous de beleza dla Talia é vegnù tegnì chest ann sun interessament dla Assoziazion Turistica alalergia sun plaza de gliejia a Al Plan. Al é sté n gran suzes de publich, plu de 3.000 persones se á abiné entourn paladina y à  amiré la desfileda dles 14 partezipantes dla preselezion per Miss Italia vegnudes da dut l Trivenet. Tla finala à Erica Panizzon abù la souraventa y ala se à davagné  l titul de “Miss Bellezza Rocchetta”. 
sun l retrat: Elisa Martini y Erica Panizzon

metù ite da noeles ai 05 August 2003 da les 08:59:02 (1404 liet)
(liej inant... | 1794 letres | 2 comentars | ponc: )


Viade a Karlstadt
Cultura

 

Gran suzes per l Cor Fodom

Oramai plu de vint agn che i corisc' conesc chisc luesc y che ai mantegn de bogn raporc con n valgunes families dlafora

de Lorenzo Soratroi

 (if) Gran suzes per l Cor Fodom che la edema passeda é sté endò ghest per trei dis tla bela zité de Karlstadt, a puec chilometri da Würzburg. Al é oramai plu de vint agn che i corisc' conesc chisc luesc y che ai mantegn de bogn raporc con n valgunes families dlafora. Al fova dl 1980 sun la Plaza S. Piere de Roma can che l cor, enlaouta ensigné ju da Benigno Pellegrini, se giatova dlongia a ei n grup de mutons todesc che sonova chitares y flauc (fablos). Da ilò vegnìvel natural de descore, de se lascè na adressa. L ann dedò fova chisc mutons vegnus ite a Fodom y i corisc' fodoms fova jus a Karlstadt. Da ilò àl scomencé n raport sterch con n valgunes families che dura ciamò encuei do plu de vint agn.


metù ite da noeles ai 04 August 2003 da les 14:33:22 (853 liet)
(liej inant... | 2966 letres | comentars? | ponc: )


Alpins de Fodom sun Col de Lana
Manifestazions

 

Alpins y scizeri ladins a recordé i tomés te vera

L Col de Lana, n luech olà che duc pò se enconté, obietif soul: la pesc, ma al ne é nia tant saurì

de Lorenzo Soratroi

 (if) La bela giorneda da soredl che à caraterisé la pruma domenia de aost à dessegur envueié truepa jent a se abiné sun Col de Lana, per la comemorazion oramai tradizionala di saudés tomés te vera. La zerimonia metuda a jì da n grup de alpins da Fodom é scomenceda da les 11 con la Messa lieta dal capitan don Gianpaolo Mementi, capelan militar a Bulsan. Adum al ombolt Ugo Ruaz y al president dla sezion di alpins de Belun, Arrigo Cadore. Sun Col de Lana fòvel ence na raprejentanza dl 24' Hochgebirgsbatallion de Lienz vestis con la mondura ofiziala dl eserzit austriach. I militars à volù ester colassù, ajache i alpins fodoms fova jus d’aisciuda a la comemorazion dla mina dl Col de Lana, che vegn tegnuda vigni ann ai 17 de auril a Lienz.


metù ite da noeles ai 04 August 2003 da les 08:01:47 (925 liet)
(liej inant... | 2307 letres | comentars? | ponc: )


Festa di Molins a Lungiarü
Cultura

 

La terdeca di molins, derzedes da paur, juesc y triparies ... cie vuelen pa deplú?

Les cueghes da Lungiarü enjignará ca de vigni sort de derzedes de speisa da paur - I Studafuesc destudará la seit - Desmostrazions di laours da moliné

Dodoman, domenia, ai 3 de aost, éla tant inant con la Festa di Molins a Lungiarü. La manifestazion, envieda via dai Studafuesc, metarà man da les 10.00 dantmesdì con na S. Messa zelebreda alalergia y acompagneda da la Mujiga da San Martin de Tor. Do  la  S. Messa podaràn vijité i molins restruturés do l ruf dlongia la vila de Seres che vegn metus en funzion per la gaujion y chel entratant dut l domesdí. La Mujiga da San Martin de Tor tegnirà n pice conzert y plu tert sonarà n grup mujiga da entrategniment. Eniann saràl i verdaparcs dl  Ofize di Parcs Naturai che metarà a jì juesc, triparies y stomac sibe per mutons che per i gragn. Foto de Mario Clara: does ventoles te n scrin da la farina; dal sit http://www.ladinia.it

metù ite da noeles ai 01 August 2003 da les 23:09:31 (926 liet)
(liej inant... | 1645 letres | 1 comentars | ponc: )


Contribuc tegnis endò
Politica

 

L assessour Mussner ejamineia y tegn entratant zeruch contribuc

Y sce Roma ne ti paiassa nia plu les spetanzes a la provinzia de Bulsan? - La Consulta dess daidé garantì la liberté de minonga

Enier él vegnù publiché te n articul sun l sfuei edemanal todesch "FF" che l assessorat de Mussner tegn zeruch contribuc bele conzedus da la Consulta y chest plu avisa a la Union Generela y dantaldut a l'Union Scritours Ladins Agacins che tegn, anter l auter, davert chest sit www.noeles.net y redazioneia la plata sun l Alto Adige, con tons critics y nia dagnora conforms a la politica ladina dla Svp. Sie ciamp de jornalism ruva aboc tl ourt politich, scecan l chiet vive dl partì y chest é samben steda la gauja per chest "entardivament".


metù ite da noeles ai 01 August 2003 da les 09:32:08 (834 liet)
(liej inant... | 2941 letres | 2 comentars | ponc: )


Dla koiné ladina al Dì dla Unité Ladina à ence rejoné l assessour Mussner
Ladin Standard

 

Braies de coram ne ti joa nia al ladin

I todesc à sapù avisa cie che al va de bujegn per tegnì en pé na mendranza. Al vuel ester n lingaz scrit unifiché: l standard

Zitat da la Usc di Ladins 19.07.03: "Dla koiné ladina al Dì dla Unité Ladina à ence rejoné l assessour Mussner, dijan che sce l idiom ladin-gherdeina à souravivù tl centené passé, spo saràl ence bon de l fé sen y doman. Conclusio: l ladin standard podessa roviné i idioms de valeda...."Bera Mussner, o che al ne sa nia cie che al dij o che al é sforzé de lascé audì la medema plata che ti vegn metuda dant da si sponsors dla Regula. Mussner y sie assessorat s'á ence fistidié da scluje fora dal ejam de trilinguism i idioms ladins nia dla provinzia da Bulsan; enscì àl raforzé la tripartizion fascista. Chest fossa l assessour a la cultura ladina?

Dialetalisazion de n grup etnich vuel ence dì  folclorisazion, endebliment y en pratica ti tó l fle. 

Cie nen dij pa un di majers esperc linguistics ladins, dr. Lois Craffonara? Zitat: "Cie che i é mefodret dit dl'importanza de na grafia unitara, va moltipliché cent outes sce ala se trata de n lingaz de scritura unitar.", da Flus Leterares, pl. 421.


metù ite da noeles ai 29 July 2003 da les 10:00:17 (1145 liet)
(liej inant... | 3927 letres | 2 comentars | ponc: )


“La LISTA LADINS dess jì inant”
Politica

 

Les previjions de suzes lital é permetentes

Da l’enrescida envieda via per conesce la minonga dla jent él sauté fora che la LISTA LADINS se à enchin a encuei davagné respet y conscidrazion anter la jent

(if) Con l’ultima revista “Ladins” ova la LISTA LADINS mané fora na enrescida per vedei sciche l laour politich promuet ti ultims diesc agn vegn vedù y valuté, sce al corespon a les aspetatives y cie che la jent se aspeta per i agn che vegn. L sfuei é vegnù mané fora te passa 6.500 ejemplars y al é sté endut passa 400 che à responù a les domandes, y chest ne é nia puech. Dai resultac sautel fora n valgugn dac interessanc y indicatifs per la minonga di litadours. Oramai duc chi che à ortié ite les respostes é dla minonga che la LISTA LADINS dess jì inant con sie laour y che sia prejenza va debujegn a Bulsan. Al ti vegn reconesciù che ala à te chisc diesc agn d’ativité dé n contribut sostanzial al pluralism politich y che ala à portè pro te nosta Provinzia a plu democrazia. Sce an rejona bele de enrescides él ence da recordé i resultac dl’enrescida deda su per cont dl sfuei DOLOMITEN al Gallup-Institut da Viena y publicheda encuei tla DOLOMITEN a pl. 13. La LISTA LADINS scluj ju con l 2% y ruva enscì a se plazé atira do la Union y – cie che fej demarevueia – dant i Freiheitlichen. Demarevueia fej ence l fat che di 500 damanés respon ben 41% de ne savei nia ciamò a chi ti dé la ousc.


metù ite da noeles ai 28 July 2003 da les 14:54:24 (843 liet)
(liej inant... | 3628 letres | comentars? | ponc: )


Les Flus Leterares de Lois Craffonara / Na rezenjion dal Friul
Cultura

 

'"Lois Craffonara, un dai grancj partesans ladins"

Dant valgugn meisc él vegnú publiché per iniziativa dl Museum Ladin Ciastel de Tor la antologia de liriches "Flus Leterares dal Grijun y dal Friul" de Lois Craffonara. L liber ti sporj ai letours ladins dles Dolomites, per l prum iade te na soula publicazion, la ampla richeza poetica/lirica de nosc vejins y chel te na traduzion tl ladin dla Val Badia. Les traduzions é vegnudes fates con na archirida meticolousa dla dreta parola y dl dret son y con n grum de spligazions, a pé de plata, sun i autours, sun i idioms, sun i svilups fonetics y sun les paroles adoredes, per podei capí miec l contest de vigni poem. Les somianzes linguistiches anter Grijon, Dolomites y Friul ne é nia pueces, y va cotant soura la scempla parentela de lingac neolatins, valgugn linguisc' rejona ence de na "unité linguistica ladina", entratant spidiceda te deplú ijoles  y te n grumon de variantes con sies particolarités. Bele tl 16-17eisem secul án noté chisc liams linguistics che va da Gorizia desche pont plu oriental a Tschamut tla Surselva/Svizra desche pont plu ozidental.


metù ite da noeles ai 25 July 2003 da les 21:51:01 (1743 liet)
(liej inant... | 14480 letres | 2 comentars | ponc: )


I juesc sun Fodara Vedla
Manifestazions

 

La scuadra marora ti l’á sticheda al ultim moment

Desche pest n pedron dolomitich zinzolé de cristai - L pest vegnirá jié fora en auter ann endò

Pro i juesc metus a jì en domenia, ai 20 de messel, sun l ciampei de Fodara Vedla é les ampezanes stedes les mioures tournadoures dla pegna, depierpul che i ei ampezans é stés i plu gaierc a taié n clapon/mocul de legn y chel sibe con l sigon a man che con l manarin. La scuadra marora à messù se regucé ite les manies perdementer per ti sté do y cialé de refé. Ai ti l’à sticheda a tré n mocul/na taia, a ciarié ite n lenzuel de fen y a clipé les vaces, ma Ampez fova empò ciamò dant per 5 a 3. Fova pa i ampezans endò daidés adascousc dal "malan" desche la liejenda conta?  Enultima á l tré a la corda messù dezide ciuna scuadra che se davagna l pest di Juesc de Fodara Vedla.


metù ite da noeles ai 23 July 2003 da les 11:39:16 (1256 liet)
(liej inant... | 2333 letres | comentars? | ponc: )


Lites provinziales da d'auton
Politica

 

An se damana n sfuei de istruzions per les lites

Les informazions dess vegnì dedes te duc trei i lingac ofiziai dla provinzia  - Deguna pedia dl ladin te chesta provinzia che se rata gen "respetousa dles mendranzes"

Bele da n valgunes edemes à la provinzia de Trent publiché informazions de carater general soura les lites provinziales de chest auton sun sie sit internet. La provinzia de Bulsan é do rata tardiva, ence sce al é da dì che la gran pert dles normes vedles é vegnudes sourantoutes. An ne dess nia se desmentié che chestes informazions ne reverda nia demé les aministrazions, ma dantdaldut i zitadins y i partis. Na instruzion curta con i dac (sistem lital, consei, durada di mandac ...) y i termins plu importanc jissa de uega per duc.


metù ite da noeles ai 23 July 2003 da les 08:00:44 (790 liet)
(liej inant... | 1756 letres | 4 comentars | ponc: )


Les gran linies de program dla lista LADINS
Politica

 

"Na mioura raprejentanza politica sciche fondamenta per arjonje deplú reconesciment"

L travert dla Lista é chel de arjonje 2 aconsiadours te consei de lege y n assessour de dert y nia un cherdé a plajei 

I reporton per entier les linges programatiches dla Lista Ladins desche ales é vegnudes portedes dant en ocajion dla prejentazion en sabeda a Santa Cristina. La Lista LADINS é dantaldut dret contenta de avei arjont che da chestes lites pòla endò se prejenté sciche lista autonoma do che la lege litala dl 1998 dla Svp fova vegnuda declareda incostituzionala sun recurs de Carlo Willeit y do che nience en l ann passé ne ti él garaté a la Svp de porté tres na lege che essa prevedú n scialin lital o ciamò piec n "Ladinerpassus" che essa comporté n anientament politich di ladins. L program en curt: "Nost moviment se darà inant da fé per i derc fondamentai dla popolazion ladina, per la valivanza giuridica, per na majera sconanza dla cultura y dl lingaz, per na bona colaborazion tla sozieté. Dantaldut volonse arjonje na maioura raprejentanza politica y aministrativa di Ladins te duc i organs y organisms plu emportanc, doi aconsiadours provinziai y n raprejentant te Jonta per lege. L azes a les comiscions dl Consei provinzial y al Tribunal aministratif, la partezipazion a les comiscions dl'autonomia é n valgugn traverc emportanc. L mantegniment dl sistem lital proporzional zenza sbaramenc é n vantaje per duta la popolazion, per l pluralism politich, per la parité culturala y la colaborazion. La lege litala nueva dla Provinzia sarà per la raprejentanza ladina autonoma l prum gran compit. La lege sun l referendum che corespone ai debujegns dla mendranza sarà n'autra chestion emportanta.


metù ite da noeles ai 21 July 2003 da les 16:01:57 (931 liet)
(liej inant... | 5142 letres | 1 comentars | ponc: )


Les lites provinziales 2003 / La Lista LADINS y i candidac
Politica

 

N bel clap de 35 candidac, Giovanni Mischí dantfora

Truep entusiasm anter i 35 candidac sun la Lista LADINS, n segn che la lista brancia tla populazion ladina

Encuei (19.07.03) él vegnù prejenté te na conferenza stampa i candidac y l program dla Lista LADINS sun Mont de Pana a S. Cristina. Prum sun la Lista saràl l president en ciaria, Giovanni Mischì, secont  l aconsidaour provinzial Carlo Willeit, spo alfabeticamenter. El enstes á fat la proposta de Mischí che é vegnuda azeteda. I 35 candidac vegn n pue da duc i paisc dles does valedes ladines  y da les zités de Südtirol, valgugn ence de todesc per esprime che an ne se scluj nia ite, ma che an vuel arjonje na democratisazion te dut Sudtirol, olá che dut vegn scenó sofoié politicamenter, sce al va fora dla schedra Svp.  Sciche i esponenc dla Lista á dit  ne se án nia fat ert da giaté candidac, n segn che la Lista brancia, vegn sciazeda y reconesciuda tla populazion ladina. Enscí végnel manifesté clermenter la volenté de jí inant con chesta forza politica ladina autonoma. Sce i ladins se prejenteia con na lista de 35 candidac á chest democraticamenter dut n auter peis che sce al ti vegn demé dé lerch a un n candidat ladin soul sun valch lista y gonot metú da lassú ju, sciche al é suzedù per ejempl con la cherdeda de Florian Mussner. Daite la lista entiera ...

Sun la foto: i 35 candidac dla Lista Ladins en sabeda sun Mont de Pana a Santa Cristina.


metù ite da noeles ai 19 July 2003 da les 22:51:18 (1436 liet)
(liej inant... | 6556 letres | comentars? | ponc: )


Entratant no a la mozion de Willeit
Desvalives

 

No dl assessour Mussner a n troi dles rodes sun la streda vedla dla Val Badia

L raprejentant ladin Willeit se ova damané te na mozion che la streda vedla vegnissa valoriseda sciche troi dles rodes empede messei  passé fora per tuniei - La cleva fossa ideala

Tla senteda dl Consei provinzial da encuei (17.07.03) él vegnù traté la mozion dl aconsiadour y vizepresident ladin Carlo Willeit, con chela che al damanova de tegnì iant la vedla strada dla Val Badia sciche troi dles rodes. L frignon dlongia la Gran Ega fora s’adatassa - aldò de Willeit - per sia bela natura salvaria y sia cleva (pendenza) regolara dret ben per l transiament dles rodes y podessa ence sot l profil turistich giaté na bona valorisazion. La strada vedla- enscì Willeit - ne pò nia vegnì lasceda su daldut, davia che al passa sot ite la canalisazion y ala jirà de tant en tant debujegn de laours d’ispezion y de control dla conduta.  Sun la foto: entratant i laours de realisazion de n tunel anter San Laurenz y Lungega, l tunel ne é nia l post ideal per jí con la roda.


metù ite da noeles ai 18 July 2003 da les 16:34:39 (868 liet)
(liej inant... | 1951 letres | 1 comentars | ponc: )


1679 articui (112 plates, 15 sun vigni plata)
[ 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 ]
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.425 seconc