benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ofize a l'assistenza scolastica y universitara
Scola

 

Stipendiums: enchin a sen bele 4705 domandes

I formulars é a la leta te duc i comuns dla provinzia

(if) Enchin a sen él vegnù prejenté endut 4705 domandes da pert de studenc. Sciche l'assessoura provinziala Sabina Kasslatter Mur preziseia, él vegnù prejenté 90 domandes de stipendium per les scoles de oblianza (termin ai 16 de otober), 736 per les scoles profescionales (termin ai 30 de otober) y 3.859 per les scoles autes (termin ai 16 de otober). Ence les domandes da pert di studenc universitars pò vegnì prejentedes enchin ai 16 de otober. La Jonta provinziala pò fé te vigni moment les verifiches nezesciares sun la veritorité dles indicazions contegnudes tles domandes. Chestes verifiches vegn fates a la bisca. D'autres informazions pòn giaté pro l ofize a l'assistenza scolastica y universitara tla streda Andreas Hofer 18, palaz VII, 2. auzeda, ciamena 205, telefonicamenter ai numeri 0471 413305/412924/412925.


metù ite da noeles ai 18 August 2003 da les 17:59:52 (769 liet)
(liej inant... | 1701 letres | comentars? | ponc: )


L projet SPELL va inant
Ladin Standard


Envit a colaboré y a mané ite osservazions

Valutazion dl ladin standard enchin a encuei  per na strategia linguistica tl davegnì

de dr. Erwin Valentini

I enc che sostegn l projet SPELL ova fat fora de jì inant chest ann con n program minimal y de nuzé chesta "paussa" per elaboré na strategia linguistica per l davegnì.  L ann de paussa se ruva bel plan y al é ora de pensé a mete ju n program de laour per l 2004 y plu inant; un di ponc sun l’ajenda  sarà la revijion y validazion dl model  de ladin standard (LS) dessegné  da H. Schmid te sia “Wegleitung”.


metù ite da noeles ai 18 August 2003 da les 10:02:21 (901 liet)
(liej inant... | 5040 letres | comentars? | ponc: )


La Regola de Ampez lascia scrive danuef i statuc
Ampez

 

Les Regoles de Ampez à debujegn de vegnì revijionedes

9 regoliers se enconta edema per edema per ti cialé tres a les regoles y cialé de les atualisé - Does propostes da denant fova vegnudes desbutedes

de Ernesto Majoni

Tla Regola de Ampez végnel rejoné vignitant di "Laudes" (dles rejons dla Regola de Ampez) y dl bujegn de i mete en orden. Ultimamenter àn endò rejoné do la "Foula Granda" di 27 d’auril, olà che al é vegnù fora che al fossa ora soneda de comedé i "Laudes" dla Comunanza y dles Regoles Basses. Enscì à la Deputazion dezi de mete adum na Comiscion che proe de scrive ju danuef i Laudes: does femenes y set oms de bona volenté à azeté de tò tles mans i Laudes y de cialé sce an pò i adaté saurì ai temps che se muda. I agn passés fòvel bele prest vegnù enjigné does propostes de Laudes nuefs, una dl 1997 y una dl 1999: dutes does ne n’é endere nia vegnudes azetedes dai Regoliers, sen vuelen proé danuef. Tres les desposizions dl "laudo" (l statut dla Regola/Comunanza de Ampez) végnel regolé per menù l'aministrazion di bens comuns, di bosc y di pascui de Ampez. Les Regoles de Ampez é partides ite te endut nuef Regoles do raions, does "Regoles Autes" (Lareto Auta y Ambrizola) y te 7 "Regoles Basses" (Zuel, Campo, Pocol, Rumerlo, Cadin, Ciave, Lareto Bassa, Mandres y Fraina).

 


metù ite da noeles ai 15 August 2003 da les 21:51:04 (982 liet)
(liej inant... | 8900 letres | comentars? | ponc: )


L scesciure di telefonins
Economia

 

L scesciure di telefonins revoluzioneia les comunicazions

Tres deplù à n telefonin mobil y tres demanco tamben na linia fissa - L  marcé dla rei mobila se deladeia con la trasmiscion/receiviment de dac

Plu de 9 sun 10 talians, l 91% per ester avisa, à n telefonin te gaiofa y l adora. Aratan dut adum, spliga l'Autorité per les comunicazions, él plu de 54 milions de telefonins che scesciura dì per dì y an arata che an ruvarà a passa 55,4 milions dl 2004. Al ne é nia ciamò vegnù arjont l telefon fis tradizional en termins de valour de marcé y chest ne suzedarà nience tant atira. Aldò di dac elaborés da l'Authority végnel sciazé che l marcé di servisc de telecomunicazion dla rei fissa arjonjará tl 2003 i 17,2 miliarc de euro, contra i 14,6 miliarc de euro dla telefonia mobila. Per l 2004 déssei cresce entramidoi: la rei fissa a 18,2 miliarc y la rei mobila a 15 miliarc de euro. L setour internet é a cuota 1,4 miliarc de euro, ma per cie che reverda les perzentuales de cresciment él vegnù registré tl 2002 n aument dl 29,3%, chest dantaldut dilan a la banda lergia. Sce an confronteia l +4,6% (l cresciment dl valour de marcé tl 2002 en confront al 2001) di servisc dla rei mobila y l cresciment plu alabona +0,2% di servisc de telefonia fissa, podéssel propi ester la rei (l web) l setour con les majeres poscibeltés de cresciment.


metù ite da noeles ai 15 August 2003 da les 11:44:32 (900 liet)
(liej inant... | 4228 letres | 1 comentars | ponc: )


Comentar al articul "L'autra pert dla medaia"
Cultura

 

La  gran ipocrisia dla "Concordia 2000"

Schiller y Dolasila ne essa nia dé ca sie inom per de tel operes

(travers) Trueps de chi de Al Plan se baudia che ai ne aud nia la Concordia, a mi me àl sapù bel de audì chela autra ciampana sun noeles.net. Finalmenter zachei che dij fora cler cie che trueps pensa de chesta operazion de marketing turistich! L autour dl articul sotlinieia la finalité economica dla ciampana, chela de cherdé adalerch sciori y grosc, a dann dla pesc, dl ambient, di sentimenc dla jent dl post. Perdret ne fossa chest degun scandal, la storia nes ensegna pu che l enteres economich, la engordia ne se archita dant da deguna bariera culturala, morala o religiousa. La gliejia enstessa ne à nia bazilé tl passé a soné les ciampanes per cherdé la jent a fé veres santes y manco santes y a soné adum per la gloria de valch potent sun la Tera. L scandal sta tla ipocrisia de chi che ne se enfida nia a dé pro de cie che al se trata y proa de vene la ciampana sciche na opera de ben per l'umanité.


metù ite da noeles ai 14 August 2003 da les 09:27:52 (818 liet)
(liej inant... | 2837 letres | 2 comentars | ponc: )


Servisc per la formazion dl personal
Sanité

 

Curs: motivazion y cualité tl laour sozial

Poscibeltés de svilupé "motivazion y cualité"

(if) A duc i colaboradours dl ciamp sozial che volessa mesuré la cualité y la motivazion te sie laour ti végnel pité ai 2 y 3 de otober 2003 a Persenon n curs da pert dl servisc provinzial per la formazion dl personal. I interessés pò ciamò se anunzié enchin ai 2 de setember 2003, chest lascia alsavei l ofize competent. L curs "motivazion y cualité tl servisc sozial" é pensé dantaldut per colaboradours che laora a temp plen, ma ence a volentars tl ciamp sozial. I partezipanc al curs empara a pensé do a sia motivazion te sie laour. Al ti vegn sclarì la relazion anter motivazion y cualité dl laour. Tl curs végnel souraprò ence medité sun les poscibeltés de svilupé "motivazion y cualité". Referent é Frank Frese che é dozent tla scola auta de Solothurn tl nord ovest dla Svizra y consulent lede de formazion. L curs vegn tegnì en juebia ai 2 y ai 3 de otober 2003 tl Jugendhaus "Kassianeum", Brunogasse 2, a Persenon.


metù ite da noeles ai 13 August 2003 da les 20:38:06 (1027 liet)
(liej inant... | 2088 letres | comentars? | ponc: )


Dal ofize provinzial per la ciacia y la pescia
Desvalives

 

Ejam da iagher per l'abilitazion a jì con l sclop


Les domandes de amiscion al ejam enchin ai 29 de aost - Ejams teoretics y pratics

(if) Les domandes de amiscion al proscim ejam da iagher/ciaciadour mess vegnì prejentedes al ofize provinzial per la ciacia y la pescia a Bulsan enchin ai 29 de aost, enscì lascia alsavei l ofize competent. L proscim ejam pratich vegnirà tegnì a San San Laurenz - demé per l ejam da sclopeté - ai 14, 15 y 16 de otober. A Maran-Maia Bassa  depierpul vegniràl tegnì tamben l ejam da sclopeté che chel de teoria per duc i candidac dai 21 ai 24 y ai 28 de otober. Al ejam ne pòl nia tò pert  chi che à fat l servisc zivil, sciche prevedù da la legislazion nazionala. Les domandes de amiscion sun cherta  boleda da € 10,33 pò vegnì prejentedes al ofize per la ciacia y la pescia (Bulsan, streda Brenner 6), olà che an giata ence i formulars per fé domanda. L term ultim de prejentazion é l 29 de aost.


metù ite da noeles ai 12 August 2003 da les 14:07:22 (850 liet)
(liej inant... | 2770 letres | comentars? | ponc: )


N'autra ciampana
Cultura

 

Concordia 2000: l'autra pert dla medaia


Ence les ciampanes pò daidé la gran speculazion turistica


de Umbert Cians

 MAREO - La gran ciampana é metuda su, Plan de Corones deventa l ciampanil per la Val de Puster y dla Val Badia. Les ciampanes dl post dess scuté per ne desturbé iniò i sciori y la jent dl post che dorm via per l di y busia de nuet. L di é sen per trueps rosedé. Les ciampanes auda perchel dalonc dal paisc y ales pò demé soné can che l mone dl turism l lascia pro. I trei ombolc entourn Plan de Corones à dé sie bensté. Al é vegnù rejoné truep de chesta ciampana, les dificoltés per la colé, l laour dl artist per la creazion dles figures, di simboi da mete soura via, la cornisc dles montes entourn Plan de Corones, l'infrastrutura per la mete su y la fé soné. Aldò dl inom l'ambizion é grana: crié Concordia tl mond, ma souradut anter les firmes che fej pert dl Skirama a na moda che ales se vegne y souradut che ales laore y davagne ben. La gran ciampana de Roverei, fata per i tomés te vera, fova denant sun n ciastel te Roverei y spo per segureza fòvela vegnuda metuda su dlongia l monument ai tomés te vera. En curt: dlongia la zité y con n segnificat che duc veid ite. Ala sona y recorda vigni seira i tomés te vera. Tl caje dla ciampana Concordia messonse propi ester naifs a ne pensé nia a la speculazion turistica: la ciampana à debujegn di implanc portamont per podei ti ruvé permez a ti cialé ju. A inom dl turism vigni piza de mont pò deventé n Col de Lana, ruiné y rosedé sotissoura, deventé na plaza per i fligri, n salf da conzert.


metù ite da noeles ai 12 August 2003 da les 09:48:54 (933 liet)
(liej inant... | 5254 letres | 1 comentars | ponc: )


Sanité: assegurazion per l guern
Sanité

 

L projet „assegurazion per l guern“ te internet

Dut cie che é interessant da savei sun l projet „assegurazion per l guern“ te Südtirol é da sen inant da abiné ence te internet.


Do che an à bele publiché y spartì fora l codejel (brosciura) de informazion dal titul „Gutes Gefühl - Die Pflegeversicherung des Landes Südtirol“, (samben demé per todesch y talian, i ladins ne esisteia nia tla provinzia dles mendranzes, n.d.r.) pò sen la jent ence cialé do plu avisa duc i particolars sun chest projet tles plates dla rei zivica (www.provinz.bz.it/pflegeversicherung). An giata na lingia de domandes-respostes a argomenc desvalifs: dert a l'assistenza, prestazions asseguratives, assegns de prestazions de guern, grovaries, esenzions y contribuc de oblianza y e.i.. Al é ence prevedù la poscibelté de dejciarié ju la brosciura entiera.
Die Pflegeversicherung  des Landes Südtirol


metù ite da noeles ai 11 August 2003 da les 17:33:06 (1018 liet)
(liej inant... | 1831 letres | comentars? | ponc: )


Santa Maria Maiou ta Fodom
Manifestazions

 


Mujiga y speisa ladina


Dai 14 enchin ai 17 de aost orghegn a mantesc, tircles, balotes y crafons


de Lorenzo Soratroi

An scomenciarà bele en la veia, can che i Studafuesc da Fodom daurirà l tendon sun plaza de Reba che jirà inant per cater dis. Ai catordesc da seira da les 21 tl Salf di Congresc metarà  a jì l Cor Fodom l tradizional conzert, chest ann adum al Cor S. Romedio Anaunia, de Romeno, n Val de Non. L pont culminant dla festa sarà en vender ai chindesc de aost. A la Pli se abinaràl endò adum les eles con l guant da fodoma y ales portarà te gliejia i mac de ciofs da benedì. L’Union di Ladins da Fodom che met a jì la manifestazion envieia dutes les eles a se vestì l guant da festa da zacan. Sciche vigni ann végnel dé fora l pest “Santa Maria Maiou” a chi che s’à dé da fé per tegnì su la cultura ladina de Fodom. Entournvia vegniràl enjigné ca speisa fodoma, con tircles (toutres), balotes y crafons, l dut vegnirà acompagné dal son dl orghen da mantesc. A Reba depierpul vegniràl porté la Madona dai mutons (tousc) de Reces. En domenia, ai 17.08.2003, ti tocaràl al Grup de Bal da Fodom de mete a jì l’enconteda di grups da bal dl Agordin.


metù ite da noeles ai 11 August 2003 da les 12:25:38 (974 liet)
(liej inant... | 1939 letres | comentars? | ponc: )


Fodom-Col-Ampez
Cultura

 

Al spizoleia l terz Istitut Ladin

La pruma senteda ofiziala dl Istitut nuef per Col-Ampez y Fodom - L ombolt da Col: "Sen messonse laoré per che les provinzies da Bulsan, Trent y Belun reconesce la Union Generala"

de Lorenzo Soratroi

L prum embrion dl Istitut ladin "Ciasa dla Cultura ladina" à ciapé forma enchestadì ja Col Santa Lizia. Sun envit dl Capocomun Paolo Frena, s’àl abiné enfat l comité che messarà ti dé forma a chesta istituzion importanta per i trei comuns de Col, Ampez y Fodom. A la senteda à tout pert i raprejentanc dles aministazions de comun y dles trei unions ladines, clamés a fè pert de chest comité propi da na delibera dl consei de comun de vignuna dles trei comunités ladines. Deberieda a chisc ence doi esperc de aministrazion, l dot. Luca Agostini y la dot.a Antonella Fiore y i diretours di istituc de Fascia y Badia, Fabio Chiocchetti y Leander Moroder.  Sun l retrat: entratant la pruma senteda ofiziala.


metù ite da noeles ai 11 August 2003 da les 10:44:54 (885 liet)
(liej inant... | 4079 letres | 1 comentars | ponc: )


Mostra Tla Ciasa de Ra Regoles
Cultura

 

"Con l cender ti uedli"

Les fotografies de Francesco Fossa, n viade amesa jent desmentieda tl Afganistan -Daverta vigni dì da les 10.00 a les 12.30 y da les 16.00 a les 20.00

de Ernesto Majoni

En mertesc, ai 5 de aost, ti locai a plan-tera tla Ciasa de Ra Regoles, él vegnù inauguré na mostra de fotografies n pue fora dl solit: "Con l cender ti uedli - Afghanistan-Pakistan", de Francesco Fossa. Al é vegnù esponù demé n valgunes dles fotografies che Fossa, n jornalist y fotograf da Roma che laora per l TG 4, à fat ju da setember enfin november dl 2001 anter l Afghanistan y l Pakistan, belavisa entratant i dis che l’Alianza dl Nord vegniva inant devers Kabul. Anter dutes les manieres de mostré n paisc te vera, ti à Fossa cialé a la vita da vignidì dla jent decà dal front. Vive te chisc paisc vuel dì sciampé vigni dì da les bombes y da les mines, dai militars che va tles ciases a se tò femenes y mutons, da la jent che se copa anter ei, da les malaties, da la fam … Dutes desgrazies che ilò conéscen da semper, che desdruj, che bruj dut y che lascia endò demé cender. Per via dl inom che an ti a metù a sia mostra, à Francesco Fossa dit: "L cender fej vegnì dut grisc, al se poia sun l’anima dla jent, al scuresc l rì, al cuerj les pascions de duc: enscì ésen te vera ence can che degugn ne se pugna y che al ne jola na moscia. Lajù, la vera é oramai engraveda ti uedli dla jent."


metù ite da noeles ai 10 August 2003 da les 09:40:57 (845 liet)
(liej inant... | 2512 letres | comentars? | ponc: )


Empaziament dl aier
Desvalives

 

Ozon, n gas da mete averda

L gran ciaut deida la formazion dl ozon tl aier

(if) Enier da seira da les 19.00 él vegnù superé l livel de verda dl ozon (180µg/m³) a Bulsan tla streda Amba Alagi con 193 µg/m³. Al à duré does ores. Tles autres stazions de souraverda tla provinzia, enscì informeia l labor provinzial de chimica y fisica, ne é i valours de verda nia vegnus superés, ma an é dlongia. 


metù ite da noeles ai 08 August 2003 da les 16:21:13 (797 liet)
(liej inant... | 1687 letres | comentars? | ponc: )


Natura y ambient
Desvalives

 


L parch natural Scilier deventa majer


A convence la jent dantaldut ence i maiours contribuc, enfin al 50% plu auc che defora dai parcs


(if) La jonta dla provinzia à dé pro chisc dis l ampliament  dl parch natural dl Scilier desche proponù dal comun de Tiers. L ampliament aspana 946 hectars endut . Sodesfat l assessour al ambient Michl Laimer: "Nia demé ciuldì che al se trata de na contreda che al paia la mueia de mete sot sconanza, ma ence ciuldì che  l'iniziativa é pieda via dal comun de Tiers, cie che desmostra che l conzet di parcs naturai é n model che vegn reconesciù y aprijé". L parch natural dl Scilier tol ence ite raions ladins y termeneia con Fascia. Sun la foto: na veduda dl Ciadenac.


metù ite da noeles ai 08 August 2003 da les 16:09:09 (918 liet)
(liej inant... | 3316 letres | comentars? | ponc: )


Scodiment dles coutes regionales
Politica

 

Acord con l'agentura dles entredes per scode la Irap y l'enjonta Irpef

Per ti sporje n servisc plu damprò ai paiadours dles coutes

(if) Enier (07.08.2003) él vegnù firmé dal assessour provinzial Michele di Puppo y dal diretour general dla agentura dles entredes, Raffaele Ferrara, na convenzion anter Provinzia autonoma de Bulsan y l'agentura per l servisc de scodiment dl'Irap (al é la couta d'enjonta dla Region, ex ILOR) y dla enjonta regionala sun l’Irpef. 


metù ite da noeles ai 08 August 2003 da les 10:34:24 (844 liet)
(liej inant... | 4056 letres | comentars? | ponc: )


1679 articui (112 plates, 15 sun vigni plata)
[ 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 ]
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.993 seconc