Seira de diapositives y tecniches da fé ju

L Fotoclub Val Badia à ence na bela plata internet http://www.fotoclubvalbadia.ladinia.net 

L Fotoclub Val Badia envieia duc a na seira de diapositives y fotografies – olache al vegnirà dedò ence fat na discuscion soura les tecniches, i aparac, i films adorés da fé ju y soura l‘impostazion dles fotografies lascedes vedei – en mercui ai 12 de november da les 20.00 tl
salf dl Istitut Ladin ”Micurá de Rü” a San Martin. I fotografs al laour.

Tant costa pa l multilinguism?

Te na sozieté monolinga mess i zitadins che rejona n lingaz minoritar daidé finanzié i servisc culturai per la maioranza

de dr. Erwin Valentini

L European Bureau for Lesser Used Languages (EBLUL) à organisé ai 13 de otober a Bruxelles, en colaborazion con l Parlament europeich, na conferenza sun l tema «Focus on linguistic diversity in the new Europe”. La conferenza volova dantaldut ti pité n forum a les mendranzes linguistiches di paisc candidac per porté dant siei problems y enrescì cie che ales pò se aspeté da la Union europeica (UE). I problems di paisc dl est é trueps y gragn; per ejempl, la Slovachia, n paisc de 5.5 milions de abitanc, compeida na doseina de mendranzes linguistiches y culturales. Sceben che duc chisc paisc ae lité per la democrazia liberala y n valgugn ae ence sotscrit la “Charta europeica di lingac regionai y minoritars” dl Consei d’Europa, ne se ài ciamò nia delibré dldut dl’arpejon storica vedla de cenc de agn. Da una na pert ne corespon la politica reala di governs nia dagnora a les declarazions de prinzip, da l’autra pert souravìvel tenscions y conflic anter popui y etnies che à marscé per secui la sozieté dla Mittel-Europa. Les mendranzes de chisc paisc veid tla costituzion dla EU na garanzia de democrazia y n cheder politich-giuridich per fé valei siei derc visavis dles autorités nazionales.

Al vuel ester n projet global per conduje adum la comunanza ladina

I contac de colaborazion interladina tl ciamp dl lingaz é praticamenter n dejaster

de Fabio Chiocchetti dl Goti/Moena

I volesse con chest contribut porté dant valgunes reflescions en cont dl endrez che l moviment politich ladin te Fascia à conesciù da n trat encà, y sclarì tl medem temp mia posizion tedant les litazions, ajache valch outa sun la stampa dut é vegnù reporté n pue massa alalesiera a chestions personales o de paisc. Defat, canche en chesta aisciuda éi dé de retourn la tessera, éi volù dé n segn sterch de critica ti confronc dla dirigenza dla Union Autonomista Ladina (UAL), y descedé na reflescion che perauter ne é nia vegnuda adalerch. Ala se tratova aboncont demé dl ultim episode de dejaje che se fajova sentì da n bon trat encà.  L laour per fé cresce y renforzé la coscienza ladina é dut auter che fenì y dess jì soura i confins teritoriai fora.

L Istitut Cultural Ladin "Ciasa de Jan" à sen sie statut

Bandida per tò su n colaboradour aministratif, les domandes pò vegnì prejentedes enchin ai 27 de otober

de Lorenzo Soratroi

(if) L statut é vegnù aprové te chisc ultims dis dal comité costitutif che é formé dai raprejentanc dles aministrazions di Comuns y dles Unions Ladines di trei comuns ladins storics, dai diretours di istituc de Fascia y Badia y da doi esperc de chestions aministratives. Do n isté de discuscions y de laour él vegnù enciarié l dot. Luca Agostini da pert dl comité costitutif a mete adum n statut, al l à porté a bon fin, al é l prum ziedl per mete a jì l istitut per i trei comuns. Al é vegnù descorù  truep sun la forma giuridica da ti dé a chest ent nuef che dess ester l plu saurì poscibel da manejé dal pont de veduda burocratich. Al fossa sciode sce na gran pert dl temp y di scioldi a disposizion jissa perdus per gauja de chertes o de n manejement massa peigher. L istitut sarà na assoziazion con sozes fondadours, i trei comuns, les trei unions, ma con la poscibelté de tò ite d'autri sozes che deida finanzié l laour scientifich. Tl statut él ence prevedù na pert de finanziament fissa da pert di Comuns y dles Unions; chest per permete l funzionament dla strutura ence sce i finanziamenc statai che vegn da la lege 482/99, essa da se entardivé o da vegnì a mancé daldut .  Sun l retrat: la Ciasa de Jan a Col Santa Lizia dant l derturament.

Ester politicamenter autonoms vuel dì laoré plu davejin a la jent

Arateise che al fossa vegnù fat dutes chestes operes zenza la sburla dla Lista LADINS?

de dr. Lois Castlunger dla LL

Mies trei respostes a les trei domandes metudes dant da la redazion (ciala plu enju per les domandes, ndr):

1) Sce i volon souravive sciche mendranza, spo messonse ti dé na majera importanza al lingaz, chel vuel dì se dé da fé per giatè n lingaz ladin scrit unifiché, y crié les normes per l ensegné y l adorè.

2) Na raprejentanza autonoma é de gran importanza per vigni mendranza, ciuldì che demé enscì ciafia na mendranza de lascé audì sia ousc autentica, zenza ester condizioneda. Chest  ne vuel nia dì che ala fej dut da soula, ma ala se chirirà chi partis che é a una con sie program y che deida realisé chest program.

Di internazional (17-10-2003)per scombate la puerté

Ence Südtirol é atoché da chest fenomen - la politica ne dess nia se ouje demez

En ocajion dl di internazional dla puerté recorda la Lista LADINS che ence Südtirol é atoché da chest fenomen y che la politica ne dess nia ouje demez l’atenzion da chesta realté con laudé tresfora l gran benester y apriejé la conjuntura economica che floresc tant ben. Te nosta provinzia ne i vàla giut nia tant ben a duc co che valch politicher volessa nes fé creie (cis sen dant les lites). L aument sun l cost dla vita se fej sentì tres deplù y vegn dantaldut a pesé sun la categoria di laoranc y sun les families joenes.

Na politica mediala da Medieve te Südtirol, dantaldut envers i ladins

La Lia per popui manacés ghira finalmenter n sostegn finanziar per lege y nia do vueies politiches per i media ladins - Mussner tegn tres ciamò zeruch contribuc

La Court Costituzionala a Roma à dé sie bensté al sostegn finanziar per lege a "Südtirol Heute" (telejornal per todesch de na mesora sun l canal austriach ORF, ndr, a d'enjonta de chi dla RAI), da pert dla provinzia da Bulsan. En basa a chesta sentenza dess la politica provinziala finalmenter ence asseguré per lege n sostegn comesuré ai media ladins. Ma chest à la politica provinziala enfin a sen dagnora refusé. L unich raprejentant lité tl consei, dr. Carlo Willeit, ova bele plu iadesc porté ite tl Consei propostes de chest vers, ma la maioranza les à dagnora dejaprovedes. Sconanza dla mendranza vel a na maniera evidenta demé per la maioranza todescia te Südtirol, nia endere per chela ladina. Laprò él da sotlinié che l grup linguistich ladin a desferenzia da chel todesch ne pò nia emporté media te sie lingaz dla oma.

Sun l retrat: l raprejentant dla Lia per i popui manacés, dr. Mateo Taibon.

Südtirol: democrazia en pericul, massa truepes unions de rejim

Dr. Carlo Willeit: Les somes enormes per l reclam vegnirà tert o adora trates ite dai zitadins tres sies coutes

Sun les pratiches de reclam politich, sen dant les lites, tol posizion l vize-president dl Consei dr. Carlo Willeit con chestes constatazions: „Metù man àn con brosciures ofiziales y relazions de plates y plates sun foliec dl dì y dl’edema: laudes a se enstesc paiedes con les coutes. Spo végnel entent auti y ai deventa 30% miourmarcé, vuel dì zachei paia l 30%. I taxis sforza i clienc de fé propaganda per i candidac che paia l plu. I radios privac vegn destenus y tl radio y tla televijion publica ne pòl nia plu vegnì fat confrontazions politiches publiches. Y les unions pò o miec mess fé reclam per la Svp. I membri y/o candidac de d’autri partis vegn bandis y pò se fondé na sia union, l’unica medejina contra la politica clientelara y l entravai de unions de categoria de rejim.

Trei domandes ai partis

Cie vel pa: la mendranza o valch d'auter?

Chisc dis porta dant vigni partì sies rejons, sie program, sia minonga sun la mendranza ladina. La redazion envieia la Svp, Lista Ladins y i Verc a nes mané ite per en sabeda seira les respostes a chestes domandes tres e-mail Usla@dnet.it:

1. Pensan al davegnì dla mendranza ladina, saràl meso che ala posse souravive, sce an arata che a livel economich, de "public relations", de identité ne à l lingaz ladin feter plu deguna emportanza; sce an miena che al é miec se mescedé ite con i autri o azeté na colaborazion te d'autri partis che nes tegnirà tres a n livel plu bas?
2. À pa na mendranza zenza cef, zenza sia raprejentanza autonoma, direta, na chance de podei valei valch y per cie motif déssela pa l'avei? Anter doi patrons é l dialogh dessegur plu valif che anter subordiné y patron?
3. Valgugn ombolc à dé pro che a ester con la Svp él plu saurí porté inant operes publiches, valch un auter dij che al ti basta Durnwalder. Chest vuel dì che i scioldi publics à n patron, che nos son te n monopol. É chesta la democrazia nueva?

Laour de Wilfried Senoner tl Museum Ladin

Con l sostegn dla Fondazion dla Cassa dl Sparagn él vegnù compré n'opera de Wilfried Senoner

Danter i fins dl Museum Ladin él dessegur ence chel de emplenì con l temp la colezion de operes d'ert de artisc' dla Ladinia. Una dles majeres personalités en cont de creativité artistica é sté Wilfried Senoner, artist de Urtijei che se à fat onour laoran per truepes zités d'Europa y fajan n grum de mostres personales y coletives ence a livel internazional. Wielfried à ence tout pert a trueps concursc vencian l prum pest. Artisticamenter é Wilfried nasciù bele tla berstot de sie pere, ma el à ence fat la Scola d'ert a Urtijei. Do avei laoré per n ann a ciasa él jù a Milan a frecuenté l'academia de Brera, olà ache al à abù coche professours i maestri de scultura Marini Marini, Francesco Messina y Alik Cavalieri. Do cater agn àl sclut ju si studes y al à  arjont l diplom de maester de scultura d'ert con la mioura votazion. Do avei laoré per n valgun agn a Augsburg él ruvé derevers a ciasa, olà che al à ensegné tla scola profescionala y tla Scola d'Ert de Urtijei. Plu tert laòrel demé plu per sie cont. Wilfried é sté n maester tla conescenza dles tecniches artistiches, dal dessegn a la pitura (uele sun teila, uele sun legn, pitura a fresch y e.i.), dal relief a la scultura plastica; el à dagnora adoré con gran savei y sensibelté plu sortes de materiai, l legn, l mermol, l bron, l colour, l'arjila, la mauta fina, l poliester y d'autri, adatés sun mesura y aldò dla filosofia espressiva dl moment. Chesta gran polivalenza à fat de Wilfried Senoner un di majeri artisc' che Gherdeina à abù.

sun l retrat: portal dal titul " mete sun la crousc - ressuscité"

Propaganda litala fora de mesura

An drumbla, sbroca y sbuera - I adoron raprejentanc che se damana na dreta autonomia ence per i ladins

de Lois Trebo

Manifestazion dla LL sun Plaza dla Blava a Bulsan ai 16 d'otober

Prejentazion dl program y di candidac - program de cornisc de Alessandro Trebo y Christian Pescosta

La université popolara de Fascia deura endò sies portes

Ultim termin per se scrive ite é l 17 de otober

(cg) Ai 13 de otober végnel inauguré a Poza l ann academich 2003/2004 dla université popolara dla Val de Fascia. Ela é metuda a jì dal comun de Poza en colaborazion con l Istitut regional de studes y enrescides soziales de Trent. Na scomenciadiva che va bele inant da agn y che vegn tres deplù aprijieda: l ann passé fova  i scric ite na otantina. Les lezions piarà via en vender ai 17 de otober da les 3 domesdì tl auditorium y ales durarà enchin ai 2 d'auril 2004. Te chest ann de scola vegniràl traté desvalifs argomenc:erbes da medejina, alimentazion , prum aiut, geografia, storia trentina dl XX secul, museum ladin, religion y ambient. Dlongia n'ora a l'edema de ginastica vegniràl ence pastelné. N valgunes conferenzes se darà ju con erbes da medejina, con l'Europa, la vera tl Irak y testimonianzies de viadesc.

Kultur ist das Andere in uns

N valgugn pensiers de Peter Huber per cie che reverda sia canditatura pro i LADINS en chesta outa

de Peter Huber/Lana

Zur Beantwortung einiger Fragen betreffs Kandidatur eines Nichtladiners in der Liste der LADINS, die nur in einem Land gestellt werden können, in der Sprache gleichgesetzt ist mit Identität, Identität mit Volk(sgruppe), Volk(sgruppe) mit Recht und Recht abhängig gemacht wird vom Gebrauch einer Sprache.
Erste Frage: Darf ein Nichtladiner für eine ladinische Partei kandidieren?
Antwort: Ja. Er darf. (Und sogar dann, wenn er sich bei der letzten Volksgruppenzugehörigkeitserklärung nicht als Ladiner erklärt hat.)

La domanda ne é nia Rumanc Grijon te scola sci o no, ma demé te cie velozité

Comentar dl capo-redadour dla "Quotidiana" sun la dezijion dla Govern dl Grijon de dé fora dal 2005 inant i libri da scola demé plu te Rumanc Grijon