benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Modul nuef: BBC News - noeles internazionales
Desvalives

 

Sen modul con les noeles internazionales dla BBC  

Plu inant ence n modul per podei mané e-cards per dutes les ocajions - Vijitadours radoplés do les lites

La gran sauridanza de chest program é chela che an pò saurì enjonté modui nuefs, da mete da les pertes ju, olàche al é truepa lerch. Sce vos cialeis sen sun la colona a manciancia podeise odei l modul che sourantol automaticamenter vigni dì plu outes les "headlines" prinzipales dla BBC (British Broadcasting Company) con les noeles internazionales, n servisc pité da la BBC con n liam rodunt a sia plata internet. Clican sun na noela se deurel automaticamenter la plata prinzipala dla BBC  te na vidrela nueva. An veid enscì ence tant che l ladin joa a capì l ingleis, ence sce an ne mastieia nia daldut l lingaz, esperc miena che l 70% dl vocabular dl ingleis sie de derivazion latina. N auter particolar: al ne é nia cler per cie rejon, ma do les lites se à i vijitadours al sit (hits), denant plu o manco 80-100 al dì, feter  radoplé a 150-180 al dì.


metù ite da noeles ai 16 November 2003 da les 08:52:14 (826 liet)
(liej inant... | 1998 letres | comentars? | ponc: )


L SPELL ruva sun la glacia
Ladin Standard

 

L projet de n lingaz scrit unitar ruva te na fasa critica

Problems de direzion dl projet - Sce al ne vegnirà nia giaté n troi deberieda, jirà bonamenter vignun do sie troi - Bel fòssel entratant de audì les minonghes de jent n puech fora dles istituzions: nuzadours, opinion leaders

L problem con Spell à bele metù man l ann passé, nia demé con la delibera y l arat de esclujion dl LS da pert dl Istitut Micurà de Rü (MdR). De setember 2002 fòvel vegnù enjigné ca n program per l 2003 y soura fora che ti fova vegnù porté dant al Comité Tecnich dl SPELL. Te chela ocajion fova l diretour dl Istitut Ladin MdR, Leander Moroder, dla minonga che al ne jiva nia plu debujegn de n diretour independent, che i enc convenzionés dess sourantò a rotazion la direzion y che al fossa sté eventualmenter a desposizion per fé l diretour.


metù ite da noeles ai 16 November 2003 da les 01:54:58 (1024 liet)
(liej inant... | 8384 letres | comentars? | ponc: )


Economia: la reforma tl comerz y tl turism
Economia

 

La reforma tl ciamp comerzial y turistich porta noveles

Werner Frick: "I temps de daurida y de scluta di locai te localités turistiches podarà vegnì manejés plu elasticamenter"

En juebia, ai 13 de november 2003, a Roma à i assessours per l comerz y turism de dutes les regions y provinzies dla Talia rejoné deberieda dla reforma tl ciamp turistich y comerzial. I interesc de Südtirol é vegnus raprejentés dal assessour per l’economia Werner Frick. An à rejoné coche an pò se mueve con la reforma da sen inant, respetan i lims de lege. A una ésen stés de se paré contra les interferenzes da pert di ministers de Roma.

metù ite da noeles ai 15 November 2003 da les 07:38:10 (777 liet)
(liej inant... | 2353 letres | comentars? | ponc: )


Fascia y i Ladins recorda Ezio Anesi 10 agn da sia mort
Persones

 

"I oms muer, ma les idees viv inant"

Ezio Anesi s'en é ju massa adora sun la flour dla vita - Al lascia n gran ensegnament: tegní adum ence ti momenc plu durs - El á fat na veira politica per i ladins

Les beles notes de Beethoven, Schubert, Chopin y Schumann, sonedes al piano dal maester Paolo Bernard da Cianacei che à porté dant n beliscim conzert tl teater de Ciampedel, à cherié la dreta atmosfera per recordé y onoré a la mioura vida Ezio Anesi, l politich, l amì, l om che é sté per i fascians n pont de referiment prezious y che nes à lascé dant 10 agn. Dant da la pert musicala él sté l president dl’Union di Ladins de Fascia, Antone Pollam y l secreter politich dl’Union Autonomista Ladina, Bepe Detomas (raprejentanc di movimenc che à endrezé chest moment de recordanza) a porté dant n pice entervent sun la figura de Anesi y sun i segnificac de sie laour y de sie empegn per duta nosta comunanza.


metù ite da noeles ai 14 November 2003 da les 23:42:07 (827 liet)
(liej inant... | 5471 letres | comentars? | ponc: )


Svp ladina encuei da Durnwalder
Politica

 

An vuel per Mussner na enciaria da assessour ence tla jonta regionala

I raprejentanc politics Svp se à damané almanco does encontedes al ann con Durnwalder

Raprejentanc politics dla Svp dles valedes ladines con a cef l assessour en ciaria, Florian Mussner, se à enconté encuei dantmesdì con l President dla Provinzia Durnwalder. Na atmosfera luecra, muses rientes, do l bon resultat lital che ti  à spraizé dassen les sciables te chesta fasa de tratatives per la formazion dl Govern y per damané ence valch deplù. Da pert di raprejentanc ladins él vegnù porté dant cie che an se embincia per la proscima legislatura, danter auter él vegnù damané che l assessour Mussner giate ence te Consei regional n assessorat desche raprejentant ladin.


metù ite da noeles ai 14 November 2003 da les 19:36:00 (787 liet)
(liej inant... | 2233 letres | 3 comentars | ponc: )


10 agn de SPELL vegn prejentés a Bulsan
Ladin Standard

 

SPELL, resultac y prospetives do 10 agn

Ai 1 de dezember 2003 da les 20.00 tl Josefsaal dla Ciasa Kolping con prejentazion de "Letres te n fol" de Rut Bernardi

(if) La Comunanza Ladina envieia decuermenter a la prejentazion dl Dizionar dl Ladin Standard y de d'autri laours dl grup de laour SPELL. Te chesta ocajion prejentarà l'autoura Rut Bernardi ence sie liber nuef "Letres te n fol", metù ju per LS. La seira dedicheda al SPELL veid dantfora chisc temesc: 10 agn de SPELL, resultac y prospetives da pert dl dot. Erwin Valentini, dedò vegniràl prejenté l Dizionar dl Ladin Standard (DLS): indesc IT-LS y DE-LS da pert dl dot. Vittorio dell'Aquila. Te n "intermezzo leterar" prejentarà Rut Bernardi sie liber "Letres te n fol". Ala jirà inant con la prejentazion dl prototip de coretour ortografich SPELLchecker da pert de Sabrina Rasom y Claudio Giuliani y enultima vegniràl fat na desmostrazion dl ambient lessicografich per l ladin standard da pert de Claudio Giuliani.


metù ite da noeles ai 14 November 2003 da les 15:15:04 (1264 liet)
(liej inant... | 2327 letres | comentars? | ponc: )


Fonso Willeit: cianties y balades ladines
Manifestazions

 

Na seira de "Cianties y balades ladines" a Bulsan

Metudes en mujiga da Fonso Willeit - Prejentazion de Lois Ellecosta

La presidenta dla Consulta per i problems ladins dl Comun de Bulsan, Dolores Dariz, à l plajei de envié duc canc en juebia, ai 20.11.2003, da les 20.30 tl Palaz Mercantil tla streda Argentiers 6 a Bulsan a na seira particolara dedicheda deplen a "Cianties y balades ladines" metudes en mujiga da Fonso Willeit. Dantfora paroles de Lois Ellecosta. Al sona y cianta: Fonso Willeit, bariton, Susi Rottonara y Erika Mussner, sopran y Ulrich Willeit y Max Ploner al clavier. La entreda é debant.


 


metù ite da noeles ai 14 November 2003 da les 15:02:38 (2094 liet)
(liej inant... | 2461 letres | comentars? | ponc: )


Dizionar dl SPELL sen ence on-line
Ladin Standard

 

Dizionar dl Ladin Standard sen ence on-line

Chisc dis él vegnù ciarié on-line l Dizionar dl Ladin Standard da consulté pian via da duc i idioms ladins, todesch y talian con les corespondenzes tl standard - Novité: i sinonims vegn tamben dés dant

Dant da puech él ju on-line ence l dizionar dl ladin standard a la miscion http://dls.smallcodes.org/ (enjontede chest liam a vosc "preferis"!). Con chest strument végnel fat n auter vare inant per slesiré la adoranza dl ladin standardisé. L dizionar pò vegnì consulté pian via da un di 5 idioms ladins (badiot-marou, gherdeina, fascian, fodom y ampezan), plu samben talian y todesch. Na sauridanza che an à demé con l sistem eletronich. Chest vuel dì che dan ite na parola per gherdeina végnel atira giaté la corespondenza "standardiseda". L coretour ortografich che an preveid de ruvé per la fin dl ann sarà l proscim vare.


metù ite da noeles ai 13 November 2003 da les 17:07:38 (1264 liet)
(liej inant... | 6824 letres | 1 comentars | ponc: )


Endoman: enconteda dla Svp ladina con Durnwalder
Politica

 

La Svp ladina endoman da Durnwalder

Al vegnirà metù sun meisa aodanzes y ghiranzes

Tl cheder dles tratatives sun la composizion dl Govern Provinzial nuef se enconta endoman, vender 14.11.2003, da les 11.00 na delegazion dla Svp ladina con l President dla jonta dr. Luis Durnwalder. De chesta delegazion fej pert l assessour en ciaria dr. Florian Mussner, l vize-Svp Pepi Dejaco, l sourastant dla Svp dla Val Badia dr. Franz Complojer, chel de Gherdeina ddr. Christoph Perathoner y la manejadessa dla Svp ladina dr. Alberta Tamers.


metù ite da noeles ai 13 November 2003 da les 14:39:45 (755 liet)
(liej inant... | 1081 letres | comentars? | ponc: )


Publicazions: prejentazion dla Ciasa dla Eurac
Manifestazions

 

"Na ciasa per l'Academia Europeica Bulsan. Architetura - storia - archirida"

Prejentazion en lunesc, ai 17 de november 2003, da les 10,30 tla senta dl'EURAC

EURAC.researchL fabricat tla streda Drus a Bulsan fova enlaouta dant la vera una dles majeres operes a sostegn dla politica de talianisazion da pert dl rejim fascist te Südtirol. Sen él una dles belezes architetoniches dla zité. Al é situé atira do l puent Drus, anter Bulsan vedla y Bulsan nueva. L fabricat conzepì tl stil razional fova dal 1935 inant la senta dl "Istitut per l'educazion fisica y morala dles joenes eles talianes". Do la vera él ju de engré via tres plu en melester enfin al 1995 canche l'Academia Europeica Bulsan à giaté te chesta luegia sia senta y ti à sourandé la enciaria de restruturazion al architet Klaus Kada. L profescionist austriach, dret conesciù lafora, à porté a termen la dertureda de dut l ensemble, che fova perauter bele da agn sot sconanza architetonica. Al à enjonté al fabricat vedl valgugn elemenc moderns de spiedl, de acel y de zement, fajan reflorì la strutura.
 
L  liber de Stephanie Risse-Lobis ilustreia la storia dl fabricat, les carateristiches di singui corps che l compon y l'ativité de archirida che la EURAC dejouj encuei laite, n bel ejempl de paredl con la storia suzeduda te n fabricat storicamenter de gran valuta.

metù ite da noeles ai 12 November 2003 da les 16:29:41 (968 liet)
(liej inant... | 2710 letres | comentars? | ponc: )


Ladin Standard: la polemica va inant
Ladin Standard
 

Per valch diretour é l Ladin Standard "massa talian"

Les vertoles contra l ladin Standard é tres les medemes: "massa talian", "massa fascian"

(i.o.) Ti ultims temps auden aboc che al vegn dit che l ladin standard sie massa "talian", che an mess fé mudazions per che al vegne azeté y chel nia da jent per streda, ma - gran marevueia - da persones con enciaries da diretour te Istituc ladins y plu avisa da persones de Gherdeina. Ester massa "davejin/damprò" dal talian y bonamenter massa "dalonc" dal todesch ti fej do l mote n spavent nia da creie a valgugn, che al ti va demé n tel glai ju per l spinel.  "Al é massa talian", o ence "massa fascian", végnel dit, ma al ne vegn nia dit avisa olà, cie? Al ne é nia cler, sce an vuel demé descredité o avei na vertola bonmarcé per desbuté dut cant. Mussner, l assessour a la cultura ladina tla provinzia de Bulsan, à almanco dit de ester decontra "te vigni caje nia mudé per i autri, ajache i fascians vuel, chest ne veidi nia ite". Logo sun sit dl LS: http://www.spell-termles.ladinia.net/.

metù ite da noeles ai 11 November 2003 da les 20:50:29 (1220 liet)
(liej inant... | 5350 letres | 2 comentars | ponc: )


N sit nuef per ladin
Politica

 

Bosobiz.com é ju on-line te Fascia

I envion ence d'autri web-designers ladins a nes fé alsavei sia plata y mete l liam al nost

En mertesc, ai 28 de otober, él ju on-line l sit fascian www.bosobiz.com  per  ladin cazet, talian y engleis: jì ite a man dreta!! davia che a man ciancia él n sit comerzial. Al se trata de n sit enjignoul con truepes grafiches y trueps colours. Per problems de database, dij l web-designer Pierpaolo Boso, ne é valgunes funzions y valgugn liams nia ciamò atifs, ma tost podaràn avei duc i servisc che n sit de comunité pieta: plata personala, forum, chat, ofize dla posta con la poscibelté de mané chertes eletroniches, des-ciarié musiga y e.i. donca n sit joen che se merita de vegnì cialé tres n iade y ciuldì pa nia se scrive ite.


metù ite da noeles ai 11 November 2003 da les 19:18:10 (816 liet)
(liej inant... | 1400 letres | comentars? | ponc: )


Da la senteda dl Govern provinzial da enier
Politica

 

Te trei edemes Govern Provinzial nuef al laour

Pruma senteda dl Consei Provinzial nuef ai 18 de november 2003

Te trei edemes déssela ester tant inant con l Govern Provinzial nuef. Les dezijions definitives vegnirà toutes entratant les proscimes does edemes à dit l president Luis Durnwalder do la senteda dl lunesc. Te chesta senta àl informé i assessours co che ales é judes les encontedes con i raprejentanc di partis lités tl Consei Provinzial nuef y coche el miena de jì inant. La idea é chela de jì inant con i medems partners de coalizion che fova enfin a sen, les tratatives de coalizion vegnirà bele enviedes via entratant i proscims dis. L Consei Provinzial nuef vegnirà cherdé ite ai 18 de november a sia prima senteda.  Luis Durnwalder, vedl y nuef President dla Jonta.


metù ite da noeles ai 11 November 2003 da les 11:33:14 (700 liet)
(liej inant... | 2936 letres | comentars? | ponc: )


KVW La Ila: ai 14 de november 2003
Desvalives

 

Cie é pa la pension d'enjonta-Pens+plan?

L KVW da La Ila met a jì na seira d'informazion aposta soura l tema

L KVW da La Ila lascia alsavei che al vegn metù a jì per duc i interessés na seira de informazion soura l tema: Pension d'enjonta-PensPlan. Desche referent rejonarà dr. Thomas Walder, diretour dl Centrum PensPlan enstes. A la seira saràl ence prejent l assistent sozial Iaco Clement. La seira de informazion vegn tegnida en vender, ai 14 de november 2003, da les 20.00 tla scola mesana a La Ila.
 


metù ite da noeles ai 10 November 2003 da les 17:55:00 (1634 liet)
(liej inant... | 1060 letres | comentars? | ponc: )


Comentar: La Lista LADINS va inant
Politica

 

"La steila da mont" à sen l temon tles mans

La storia  tles democrazies desmostra che la situazion pò ence se ouje - Willeit fova bon de se bate tres contra dutes les oposizions tla Consulta

(i.o.) Con interes àn liet la comunicazion dla lista "LADINS" che ala vuel jì inant con sie program, ence zenza mandat te Consei, condut la gran delujion per l resultat lital de chest auton, antia y ria da glotì. Samben, sen do les lites é l podei dla Svp (ladina) a les steiles, l 60 % y passa dles oujes, n resultat che si raprejentanc ne se à bonamenter nience aspeté te si miours soms, fosc adenfora de Franz Complojer, ombolt da La Val, che ova dit dant les lites "Ich versichere der Svp ein Bombenergebnis". Ela pò sen deté dassoula les condizions politiches y la direzion culturala, la direzion dl Istitut Ladin, la composizion dla Consulta Ladina che partesc su la tourta di contribuc a la cultura y à con chest ence forza de endrez, grems scolastics che vedlarà con uedli da falcon che al ne vegne ben nia ensigné massa ladin y e.i.  Y la Svp (ladina) pò se "pone" comot sun sie plomac penc de oujes, ela raprejenteia la stragran maioranza di ladins y pò reclamé: "la creta dla jent onse nos". L Edelweiss dà sen dant cie ora che al é.


metù ite da noeles ai 09 November 2003 da les 09:13:43 (877 liet)
(liej inant... | 5480 letres | comentars? | ponc: )


1679 articui (112 plates, 15 sun vigni plata)
[ 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 ]
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.359 seconc