benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Noeles.net - Informazion ladina: Manifestazions

Chirí te chest tema:   
[ Endò a la pruma plata | Cernede n tema nuef ]

Juesc de Mont ite a La Stua
Manifestazions

 

Maroi y ampezans mesura endò sies forzes y sie slum

Seconda edizion di Juesc da Mont, chest ann ite a La Stua  - En l ann passé ti l'ova sticheda i jugadours maroi sun Fodara Vedla

Te na colaborazion anter les assoziazions turistiches de Al Plan de Mareo y de Cortina d'Ampez végnel metù a jí en domenia, ai 18 de messel, da les 10,30 inant la seconda edizion di "Juesc da Mont", chest ann sun Mont de La Stua t'Ampez tl Parch Natural dles Dolomites Ampezanes. Les scuadres marores y cheles ampezanes se mesurarà endò pro n clap de juesc che é valch moda liés al laour da paur. En l'ann passé ti l'ova sticheda sun Fodara Vedla i maroi tla classifica finala. Orela curta, beive y mangé sun l post.
 

metù ite da noeles ai 14 July 2004 da les 23:26:33 (1498 liet)
(liej inant... | 4264 letres | comentars? | ponc: )


Conzert de Badiamusica
Manifestazions

 

N conzert a onour dl Sant Ojöp Freinademetz

Cor y orchestra dl dom da Persenon cianta y sona a onour dl Sant, ai 29 de mei tla gliejia de Badia

Badiamusica met a jì en gaujion dla festa a onour de S. Ojöp da Oies l conzert con l cor y l'orchestra dl Dom da Persenon. L conzert sarà en sabeda ai 29 de mei da les 21.00 tla gliejia de Badia. Al sonarà ence Franz Comploi (orghen) y al ciantarà Clara Sattler (sopran), Valeria Gasser (alt), Martin Gruber (tenor) y Gebhard Piccolruaz (bas) sot a la bacheta de Heinrich Walder.


metù ite da noeles ai 21 May 2004 da les 10:22:30 (1214 liet)
(liej inant... | 1972 letres | comentars? | ponc: )


Dal museum Natura de Bulsan: prejentazion nueva
Manifestazions

 

L stuep dla flour y les miels

Endoman, juebia ai 13 de mei da les 18.00, prejentazion soura les miels tl Museum Natura a Bulsan - Poscibelté de ciarcé les desvalives sortes de miel

"Lo spettro pollinico dei mieli dell'Alto Adige", chest é l titul dla publicazion nueva dl Laboratore Biologich (agentura per la sconanza dl ambient) che vegnirà prejenteda endoman juebia, ai 13 de mei da les 18.00, tla senta dl Museum Natura a Bulsan, str. Binder 1. L liber descriv les enrescides de na archirida baseda sun l'analisa microscopica dl stuep dla flour per ester datant da fé controles segures sun l'origin y la provegnenza dla miel y de dé n marcl d.o.c.


metù ite da noeles ai 12 May 2004 da les 08:33:44 (866 liet)
(liej inant... | 1869 letres | comentars? | ponc: )


Ciastel de Tor: laours dla scola d´Ert de Selva
Manifestazions

 

La Scola d'Ert de Selva va te museum

Encuei, 2 d'auril 2004, da les 6 da seira, gniràl enaudé ti locai dl Museum Ladin Ciastel de Tor a San Martin de Tor  la mostra dedicheda a la storia dla Scola d'Ert de Selva.

L'ocajion é chela dla scluta dla scola de jugn dl 2003 do ben 95 agn y do avei vedù passan tres sies aules fora na gran cumpeida de studenc, ensegnanc y deplù diretours. Zacotanc de chisc é gnus artisc' de renom, zipladours o pitours che à lascé endò fusties emportantes. Chi che à ensegné o fat l diretour, laorova ence depierpul desche zipladour o pitour.

Foto: trueps artisc' ladins à fat la scola d'ert a Selva, enscì ence Gilbert Prousch da San Martin de Tor, conesciù desche duo d'ert: Gilbert & George. Al viv a Londra.


metù ite da noeles ai 02 April 2004 da les 08:25:02 (1120 liet)
(liej inant... | 2910 letres | comentars? | ponc: )


Conzert Cianties y balades ladines
Manifestazions

 

La patria, i creps, i colours dles sajons, i amours

Fonso Willeit, Susy Rottonara y Erika Ploner acompagnés al clavier da Ulrich Willeit y Max Ploner endò dant al publich 

de Ulrike Frenademez

Do la premiera de "Cianties y balades ladines" de november 2003 tl Salf Mercantil a Bulsan, sun iniziativa dla Consulta Ladina a Bulsan, che é sté n dret suzes, vegn sen l conzert ence porté ite tles valedes ladines. L Istitut "Micurà de Rü" se à tout soura la organisazion y envieia chest fin d'edema, ai 8 de fauré da les 17.00 tla Ciasa J.B. Runcher a Badia y ai 15 de fauré, tres da les 17.00, tl'Aula Magna dla scola elementara de Urtijei.

Sun l retrat da manciancia: Ulrich Willeit, Max Ploner, Erika Mussner, Susi Rottonara, Fonso Willeit y Olga Moling,  viadedò Lois Ellecosta en gaujion dla premiera de november 2003 tl salf Mercantil a Bulsan.


metù ite da noeles ai 05 February 2004 da les 08:56:44 (1302 liet)
(liej inant... | 3720 letres | comentars? | ponc: )


Academia Europeica Bulsan: les mendranzes tl'Europa
Manifestazions

 

"Standards normatifs per la sconanza dles mendranzes y i svilups tl davegnì tla UE"

Da vender ai 30 de jené a la sabeda 31 de jené tla senta dla EURAC con esperc internazionai

Tla giurisdizion dla Union Europeica ne abìnen nia lere normes per la sconanza dles mendranzes y chestes ne fova nience prevedudes tla proposta de costituzion comunitara, per entratant metuda da na pert. Marevueia, propi la Presidenza taliana al Consei Europeich à derzé fora valch te chest ciamp, vedan dantfora n enscidit "catalogh de valours". Chest fin d'edema, dai 30 ai 31 de jené, rejonarà 13 esperc pro l Convegn metù a jì tla EURAC soura "Mendranzes y autonomia tla Union Europeica: les prospetives con l ampliament dla Union y coche al podessa ester meso de ancoré plu ferm prinzips de sconanza dles mendranzes al intern dles politiches dla UE".

Bojan Brezigar, President dl'EBLUL "Ofize Europeich per i lingac manco rejonés"


metù ite da noeles ai 28 January 2004 da les 08:33:37 (803 liet)
(liej inant... | 3196 letres | comentars? | ponc: )


Academia Europeica Bulsan: L'Irlanda dl Nord y l prozes de pesc
Manifestazions

 

“La Irlanda dl nord y l prozes de pesc"

Prejentazion dl liber con l prof. Antony Alcock, University of Ulster, UK, dot. Davide Bianchi, Università Insubria de Como y prof. Giovanni Poggeschi, EURAC, en juebia, ai 29 de jené, da les 17.00 tla EURAC.

Antony Alcock, irlandeis dl Nord, é da diejenes de agn n espert conesciù y chirì te tematiches che reverda les mendranzes y rejiaries (stritaries) etniches. Al é bonamenter l prum tl raion anglosasson che à analisé a fonz l’Autonomia tla Provinzia de Bulsan. L majer peis te si studes fej fora l conflit che veid sia patria scarzeda anter protestanc y catolics. En colaborazion con Giovanni Poggeschi, archiridour pro la EURAC de Bulsan y de d'autri politologs, à Alcock realisé n stude intitulé “Peace Process through constitutional arrangements in Northern Ireland” che é vegnù publiché tla morona de “I sfueis dla EURAC".

metù ite da noeles ai 26 January 2004 da les 14:51:46 (862 liet)
(liej inant... | 2567 letres | comentars? | ponc: )


Radunanza Generala dl Istitut Cultural Ladin ”majon di fascegn”
Manifestazions

 

Portes davertes tl Museum Ladin de Fascia

En sabeda ai 13 de dezember 2003, scomenciadiva metuda a jì dal Istitut Cultural Ladin "majon di fascegn" y dal Museum Ladin de Fascia

(be) Per ti dé l dret peis a la Radunanza Generala dl Istitut Cultural Ladin ”majon di fascegn”, che vegnirà tegnuda en sabeda ai 13 de dezember tl Museum Ladin, él vegnù metù a jì na giorneda ”Usc daverc” per ti lascé vijité a duc l Museum debant.

Dr. Fabio Chiocchetti, diretour dl Istitut


metù ite da noeles ai 05 December 2003 da les 11:30:36 (812 liet)
(liej inant... | 3111 letres | comentars? | ponc: )


Museum Ladin - orars de daurida d'invern
Manifestazions

 

Les cripeles da Nadel en mostra

Enaudeda ai 12 de dezember da les 18.00 - 3 dis a l'edema davert

L Museum Ladin Ciastel de Tor deura ai 3 de dezember 2003 per l terz ann entratant la sajon da d'invern sies portes. L museum romagn davert de mercui, de juebia y de venders da les 14.00 a les 18.00 enfin a la Domenia dal Olif. Entratant l temp da Nadel sarà l museum ence davert ai 8 de dezember, tamben ai  4, 5 y 6 de jené 2004. Desche bele en l ann passé végnel ence chesta outa fat na Mostra de Cripeles, dret apriejeda da la jent. La mostra vegnirà enaudeda ai 12 de dezember da les 18.00 tl cheder de na picera festa y restarà daverta enfin ai 6 de jené entratant les ores de daurida dl museum dedes dant dessoura.


metù ite da noeles ai 02 December 2003 da les 15:11:46 (716 liet)
(liej inant... | 1190 letres | comentars? | ponc: )


Fonso Willeit: cianties y balades ladines
Manifestazions

 

Na seira de "Cianties y balades ladines" a Bulsan

Metudes en mujiga da Fonso Willeit - Prejentazion de Lois Ellecosta

La presidenta dla Consulta per i problems ladins dl Comun de Bulsan, Dolores Dariz, à l plajei de envié duc canc en juebia, ai 20.11.2003, da les 20.30 tl Palaz Mercantil tla streda Argentiers 6 a Bulsan a na seira particolara dedicheda deplen a "Cianties y balades ladines" metudes en mujiga da Fonso Willeit. Dantfora paroles de Lois Ellecosta. Al sona y cianta: Fonso Willeit, bariton, Susi Rottonara y Erika Mussner, sopran y Ulrich Willeit y Max Ploner al clavier. La entreda é debant.


 


metù ite da noeles ai 14 November 2003 da les 15:02:38 (2154 liet)
(liej inant... | 2461 letres | comentars? | ponc: )


Publicazions: prejentazion dla Ciasa dla Eurac
Manifestazions

 

"Na ciasa per l'Academia Europeica Bulsan. Architetura - storia - archirida"

Prejentazion en lunesc, ai 17 de november 2003, da les 10,30 tla senta dl'EURAC

EURAC.researchL fabricat tla streda Drus a Bulsan fova enlaouta dant la vera una dles majeres operes a sostegn dla politica de talianisazion da pert dl rejim fascist te Südtirol. Sen él una dles belezes architetoniches dla zité. Al é situé atira do l puent Drus, anter Bulsan vedla y Bulsan nueva. L fabricat conzepì tl stil razional fova dal 1935 inant la senta dl "Istitut per l'educazion fisica y morala dles joenes eles talianes". Do la vera él ju de engré via tres plu en melester enfin al 1995 canche l'Academia Europeica Bulsan à giaté te chesta luegia sia senta y ti à sourandé la enciaria de restruturazion al architet Klaus Kada. L profescionist austriach, dret conesciù lafora, à porté a termen la dertureda de dut l ensemble, che fova perauter bele da agn sot sconanza architetonica. Al à enjonté al fabricat vedl valgugn elemenc moderns de spiedl, de acel y de zement, fajan reflorì la strutura.
 
L  liber de Stephanie Risse-Lobis ilustreia la storia dl fabricat, les carateristiches di singui corps che l compon y l'ativité de archirida che la EURAC dejouj encuei laite, n bel ejempl de paredl con la storia suzeduda te n fabricat storicamenter de gran valuta.

metù ite da noeles ai 12 November 2003 da les 16:29:41 (979 liet)
(liej inant... | 2710 letres | comentars? | ponc: )


Dal Ofize dles Eghes
Manifestazions

 

Arsen tl’ega da beive – convegn ai 14 de november

I temesc é: l arsen tl’ega da beive, i valours dla normativa nueva che va en doura ai 25 de dezember y les descorides scentifiches te chestions de sanité y de tratament dl’ega.

(if) Arsen é sun dut l mond n tuesse che an abina dret sovenz tl’ega de sotfonz. Demé datrai vegn chest gaujé da les persones enstesses desche per ejempl canche al vegn ciavé do minerai metalics o can che al vegn adoré pestizids. Tla majera pert di caji é l arsen da abinè tl sotera per rejons naturales, al se desfej ti sedimenc da ega y ruva a chesta maniera tl’ega de sotfonz. Te de plu condutes da l’ega te Südtirol él bele vegnù registré valours de arsen plu auc de chi azetés da la organisazion mondiala per la sanité WHO. Chisc valours de 10 micrograms per liter vegnirà dal 25 de dezember 2003 inant ence de oblianza tla Talia aldò dl decret Nr. 31/01. Per chesta rejon met la Repartizion Provinziala per la sanité, ega y energia a jì n convegn dal titul „arsen tl’ega da beive“.

 


metù ite da noeles ai 06 November 2003 da les 13:49:07 (924 liet)
(liej inant... | 2777 letres | comentars? | ponc: )


Da la lia dl teater d'La Pli
Manifestazions

 

Cristl da Ras - teater te cater pertes

Premiere: en vender, ai 31 d'otober 2003 da les 20:30 tla Ciasa dles Unions a La Pli de Mareo

Cie pò pa l teater d'La Pli se ghiré deplù che podei porté dant sun paladina na contia popolara de Mareo, scrita da n scritour y ciantautour d'La Pli! Bele da deplù agn nes onse dé ju con l'idea da joblené n teater nia demé tl lingaz ladin, ma da prejenté n iade a nosta jent n dret toch ladin y nia na traduzion da n lingaz forest. Per chest auton èsela sen tant inant. L toch "Cristl da Ras" é vegnù scrit dal scritour Iaco Rigo. La storia se baseia sun na contia popolara de nosc raions. Cristl da Ras dess avei vit a Al Plan de Mareo entourn l ann 1600. Al à n talent natural da medié tiers y jent. Al vegn conté che n bel dì s'essa l malan prejenté da el y i essa pité forzes da strioné. Lassoura essa l malan volù l'anima de Cristl...


metù ite da noeles ai 29 October 2003 da les 16:37:01 (1103 liet)
(liej inant... | 2925 letres | comentars? | ponc: )


Da la Comunanza Ladina a Bulsan
Manifestazions

 

A Acuileia,  vedl zenter de cristianisazion dles Alpes

Al ti é vegnù scinché a la Comunanza Ladina de Bulsan la Bibla furlana - Da Acuileia é pieda via la cristianisazion de nosc raions - Jevun depenova da chesta senta


(if) Desche vigni ann à la Comunanza Ladina ence chest ann metù a jì n viade cultural pro na mendranza etnica. L ann passé sonse stés a Giazza/Ljetzan y a Lusern, does ijoles todesces tl Veroneis y tl Trentin; chest ann onse pensé de jì per doi dis, dai 20 ai 21 de setember, tl Friul per l secont iade per conesce plu damprò la realté culturala di ladins furlans. Al viade àl tout pert 38 sozes y amisc dla Comunanza ladina de Bulsan. Do avei vijité la basilica de Acuileia, vedl zenter religious y senta vescovila, olà che al à metù man la cristianisazion de nost raion, onse vijité la cripta dles escavazions y chela di afresc', spo sonse ruvés a Cividat, n iade capitala di Longobards: na zité neta y con de beles ciases tl zenter storich comededes fora dret dalvers. I on vijité l pice templ longobard, l museum archeologich y l pont dl Malan. Da seira onse podù apriejé i ceifs  (speises) furlans te n restorant tipich dl post.

Sun l retrat: la basilica de Acuileia, vedl zenter religious y senta vescovila che à deraié la fede cristiana te dutes les Alpes orientales y sourafora.


metù ite da noeles ai 06 October 2003 da les 17:10:07 (861 liet)
(liej inant... | 3318 letres | comentars? | ponc: )


Da la Comunanza Ladina de Bulsan
Manifestazions

 

Conzert tla gliejia ploanala de Gries

Jan Batista Runcher, sonata per orghen en d-dur y Franz Comploi - "Maria tla revelazion" per solisc', cors y orghen

Hans Karl PeterliniJan Batista Runcher y Franz Comploi, doi musizisc' ladins de epoches desvalives se sporj te n conzert en juebia ai 2 de otober 2003 da les 20.30 tla gliejia ploanala de Gries. L conzert vegn organisé da la “Comunanza Ladina de Bulsan”. Chesta scomenciadiva é nasciuda da la colaborazion anter "La Corale" dla zité de Trent (sun l retrat) manejeda da Roberto Gianotti, l ensemble Zandonai, l grup de vidoles manejé da Giancarlo Guarino che tol ite i majeri strumentalisc' dla Region Trentino- Südtirol, la ciantarina Barbara Pichler da Bulsan y l organist trentin Stefano Rattini, anter l'auter organist titolar dla catedrala trentina de San Vile.


metù ite da noeles ai 30 September 2003 da les 17:12:13 (921 liet)
(liej inant... | 3642 letres | comentars? | ponc: )


48 articui (4 plates, 15 sun vigni plata)
[ 1 | 2 | 3 | 4 ]
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.481 seconc